Pakistanın "Lead Pakistan" qəzetində tanınmış jurnalist Mahmud ul-Həsən Xanın Ermənistan-Azərbaycan, Dağlıq Qarabağ münaqişəsi və Roma Papası Fransiskin Azərbaycana səfəri ilə bağlı məqaləsi yerləşdirilib.

Axar.az xəbər verir ki, məqalədə deyilir: Dağlıq Qarabağ MDB məkanında və Qafqaz bölgəsində əsil gərginlik mənbəyidir. Bu torpaqların həqiqi sahibi olan azərbaycanlılar öz yurdlarından, evlərindən zorla qovulub.

Həmçinin məqalədə qeyd olunur ki, Roma Papası Fransisk Azərbaycana səfəri zamanı Prezident İlham Əliyev və xanımı Mehriban Əliyeva ilə görüşüb. Görüşdə Azərbaycan Prezidenti deyib: "Səfəriniz həm Vatikan–Azərbaycan əlaqələri, eyni zamanda, sivilizasiyalararası dialoq üçün çox böyük əhəmiyyət kəsb edir. Azərbaycanda bütün dinlərin nümayəndələri bir ailə kimi yaşayır, sülh, mehribanlıq şəraitində yaşayır".

Bildirilir ki, Azərbaycan Respublikasının Prezidenti İlham Əliyev və Roma Papası Fransisk Heydər Əliyev Mərkəzində ictimaiyyətin nümayəndələri qarşısında çıxış ediblər. Prezident İlham Əliyev Azərbaycanda məscidlərin və kilsələrin bərpa edilməsi, Ermənistan-Azərbaycan, Dağlıq Qarabağ münaqişəsi haqqında ətraflı məlumat verib.

Məqalədə Ermənistan-Azərbaycan, Dağlıq Qarabağ münaqişəsinin tarixi, Xocalı faciəsi haqında da söhbət açılır.