Sərhədi keçərək Şəki kəndində (Ermənistanın Zəngəzur bölgəsi - red.) saxlanılan azərbaycanlı hərbçi Nəsimi Musayev dindirilmə zamanı heç kimə zərər vermək niyyətində olmadığını bildirib.

Axar.az xəbər verir ki, bu barədə “Joxovurd” qəzeti məlumat yayıb.

Nəsimi Musayev ev sahibəsindən onu buraxmasını bir neçə dəfə xahiş etdiyini, lakin qadının silahdan möhkəm yapışdığını və buna görə də atəş açmağa məcbur qaldığını vurğulayıb.

Üstəlik, Musayev yazılı ifadəsində hadisədən sonra qadının və ailə üzvlərinin ona hücum etdiyini, bıçaqla zərbələr endirdiyini və onu döydüyünü deyib.

Zərərçəkən Ani Avetisyan isə mediaya açıqlamasında bildirib ki, evə girərkən Musayevin uşaqlarını silahla hədələdiyini görüb. Onun sözlərinə görə, azərbaycanlı üç dəfə atəş açmağa çalışıb.

Birinci dəfə o, atəş aça bilməyib, sonra oğluna atəş açmağa cəhd edib. Ani silahı götürməyə çalışıb və əsgər atəş açaraq onu yaralayıb. Məhz bu zaman Ani Musayevi bıçaqlayıb. Üçüncü dəfə isə qadının ayağına atəş açıb.

Qadın həmçinin bildirib ki, əsgərin sursatı qurtarıb və silahını yenidən doldurmağa çalışıb. O bildirib ki, müqavimət göstərməsəydi, kişi bütün ailəni güllələyə bilərdi.

Qeyd edək ki, azərbaycanlı əsgər Nəsimi Musayevin Ermənistanda saxlanılması barədə məlumat 1 oktyabrda yayılıb. 2 oktyabrda isə onun barəsində 2 aylıq həbs qətimkan tədbiri seçilib. N.Musayevin 26 sentyabrdan hərbi hissəni özbaşına tərk etdiyi iddia olunur.