"Bakı-Tiflis-Ceyhan neft kəməri ilə bağlı heç bir narahatlığa ehtiyac yoxdur".

Bu sözləri "Axar.az"a açıqlamasında Gürcüstanın Azərbaycandakı səfirinin birinci müavini Axa Abzaladze deyib.

O, Cənubi Osetiyanın işğalından sonra həqiqətən Bakı-Tiflis-Ceyhan xəttinin bir hissəsinin nəzarət olunmamış torpaqların yaxınlığında yerləşdiyini bildirib:

"Doğrudur, Cənubi Osetiyada rus orduları yerləşir və bu ərazilər işğal edilib. Amma buna görə narahat olmağa dəyməz. Çünki bu, beynəlxalq layihədir. Beynəlxalq layihə isə hər zaman nəzarətdə saxlanılır. Buna görə heç bir narahatlığa ehtiyac yoxdur. Bakı-Tiflis-Ceyhan neft kəməri ilə bağlı heç bir təhlükə olmayacaq".

Qeyd edək ki, dünən rus qoşunlarının Cənubi Osetiya "sərhəd"ində müxtəlif bannerlər yerləşdirdiyi haqqında informasiya yayılıb. Orçosanı və Xurveleti kəndlərinə təmas xəttində düzülən həmin stendlərdə gürcü, rus və ingilis dillərində bildiriş yazıları əks olunub. Beləliklə, faktiki olaraq hazırda həmin otlaq ərazi və bu məkanda yaşayan əhalinin evləri rusların nəzarətinə keçib. Həmin bannerlərin Cənubi Osetiya tərəfindən isə Bakı-Tiflis-Ceyhan neft kəmərinin bir hissəsinin keçdiyi bəlli olub.