Ermənistanın Belçikadakı səfiri Avet Adonç həddindən artıq "israfçılığı" ilə bu ölkənin kəşfiyyat orqanlarının diqqətini çəkib.

Axar.az-ın Ermənistan mediasına istinadən məlumatına görə, məsələyə rəsmi İrəvan da öz mənfi münasibətini bildirib.

Avropada diplomatlarla bağlı fəaliyyətdə olan qanun görə, diplomatik korpusun istənilən əməkdaşı 300 avrodan yuxarı alış-veriş etdikdə, həmin məbləğin 21 faizi geri qaytarılır. Verilən məlumatda erməni səfirin məhz bu amil üzrə yaxalandığı bəlli olub. Bildirilir ki, səfir Adonç arvadı ilə kifayət sayda "Rolex" saatları və bahalı daş-qaş alması ilə Belçika kəşfiyyat orqanları əməkdaşlarının diqqətini çəkib.

Məsələyə reaksiya verən sözügedən orqanın nümayəndələri dövlət qulluqçusu kimi səfirin bu qədər bahalı əşyalara pulu haradan alması ilə bağlı Ermənistanın təhlükəsizlik orqanına xüsusi sorğu göndərib. Ermənistan mediasının yazdığına görə, faktı səfirin əhatəsindəki şəxslər də təsdiqləyiblər. Belçikalılar həmin əşyalar üçün səfirin hər il 30-50 min avronu haradan almasına təəccüblərini gizlətməyiblər. Onlar 21 faizlik endirimdən erməni diplomatının ciddi qazancının fərqinə vararaq, Belçikanın dövlət büdcəsinə dəyən zərərin qarşısını əminliklə alacaqlarını bildiriblər.

Xatırladaq ki, məsələ ilə əlaqədar Ermənistanda böyük gərginlik yaşanır.