"Bir gün əvvəl danışmışdıq".

Bu sözləri Axar.az-ın cəbhə bölgəsinə ezam olunmuş əməkdaşına iyulun 31-də Qazaxın Qaymaqlı kəndində ermənilərin açdığı atəş nəticəsində həlak olmuş baş gizir Almazov İsanın dayısı oğlu Səyyad Hüseynov deyib.

Onun sözlərinə görə, aralarında bir gün öncə telefon danışığı olub: "Elə bil ürəyimə gəlmişdi. Zəng etdim. Bir xeyli danışdıq. Hətta 6 ay öncə doğulmuş iki əkiz övladını da soruşdu. Nə bilərdik ki, belə olacaq".

Şəhid olan gizirin qohumunun sözlərinə görə, güllə düz gözündən dəyib: "Xəbəri eşidəndə əvvəlcə inanmadıq. Meyiti görəndə elə bil ayıldım. Güllə düz gözündən dəymişdi. Postda olarkən vurulmuşdu".

Qeyd edək ki, Qazaxın Cəfərli sakini olan Səyyad kişi bu hadisədən iki gün əvvəl özü də erməni gülləsinə tuş gəlib: "Əmimoğlu ilə evə gedirdik. Birdən elə bil yanımda bomba partladı. Tez yerə sərildim. Əmimoğlu məndən 2-3 metr arxada idi. Ona bir şey olacağından qorxurdum. Sürünə-sürünə ona tərəf gəldim. Xoşbəxtlikdən heç birimizə bir şey olmadı. Yoxsa iki gündə iki nəfər öləcəkdik".

Xatırladaq ki, iyulun 31-də saat 20.00-da Ermənistan-Azərbaycan sərhədinin Qazax rayonu ərazisində düşmənlə döyüşdə Silahlı Qüvvələrin giziri, 1977-ci il təvəllüdlü, Qazax rayonundan hərbi xidmətə çağırılmış Almazov İsa Ziyad oğlu düşmən tərəfindən açılan atəş nəticəsində şəhid olub.

Silahlı Qüvvələrdə Baş gizir rütbəsində xidmət edən Almazov İsa Ziyad oğlunun 4 övladı var idi. 6 ay öncə 2 əkiz qızı dünyaya gəlmişdi.

Bakı-Qazax