Azərbaycan ilə Hindistan arasında tarixi əlaqələr mövcuddur. Bu gün keçirilən görüşdə ölkələrimiz arasında ticarət, elm, mədəniyyət və digər sahələrdə əməkdaşlıq məsələləri müzakirə edildi. Görüşdə iki sənəd imzalandı: “Azərbaycan Respublikası Hökuməti ilə Hindistan Respublikası Hökuməti arasında diplomatik, rəsmi və xidməti pasportlara malik şəxslərin viza tələbindən azad edilməsi haqqında Saziş” və “Azərbaycan Respublikası Xarici İşlər Nazirliyinin ADA Universiteti və Hindistan Respublikası Xarici İşlər Nazirliyinin Xarici Xidmət İnstitutu arasında Anlaşma Memorandumu”.

Axar.az xəbər verir ki, bu fikirləri aprelin 4-də Hindistanın xarici işlər naziri Suşma Svarac ilə görüşdə Azərbaycanın xarici işlər naziri Elmar Məmmədyarov deyib.

Elmar Məmmədyarov bildirib ki, söhbət zamanı Hindistan şirkətləri ilə enerji sahəsində əməkdaşlıq əlaqələri də müzakirə olundu. Həmçinin informasiya texnologiyaları sahəsində əməkdaşlıq və kadr hazırlığı məsələlərinə toxunuldu. Hindistanlı nazir Ermənistan-Azərbaycan, Dağlıq Qarabağ münaqişəsi ilə bağlı ətraflı məlumatlandırıldı.

Hindistanın xarici işlər naziri Suşma Svarac görüşün məhsuldar keçdiyini deyib. O bildirib ki, Hindistan Azərbaycan ilə münasibətlərin inkişafında maraqlıdır. Son illərdə Azərbaycana qoyulan sərmayələrin xeyli artdığını vurğulayan nazir görüşdə kənd təsərrüfatının, o cümlədən pambıqçılığın inkişafı ilə bağlı müzakirələr aparıldığını diqqətə çatdırıb. Xanım Suşma Svarac deyib ki, Hindistan terroru qlobal təhlükə hesab edir və terrorizmə qarşı mübarizə sahəsində də əməkdaşlığın inkişaf etdirilməsinə ehtiyac var.