"Ukrayna böhranı ilə bağlı Qərbin Rusiya ilə münasibətləri xeyli kəskinləşib".

Bunu Axar.az-a açıqlamasında Gənc Diplomatlar Birliyinin Baş məsləhətçisi, politoloq Elman Nəsirov həmsədr ölkələrin Rusiya ilə qarşıdurmanı Qarabağ münaqişəsi fonunda həyata keçirməsi məsələsini şərh edərkən deyib.

Elman Nəsirovun fikrincə, Uels sammitindən sonra hərbi, siyasi sanksiyaların da əlavə edilməsi vəziyyəti kökündən dəyişəcək:

"Faktiki olaraq sentyabrın 15-dən 26-na qədər NATO-nun Ukrayna ilə birlikdə hərbi manevrlərinə start veriləcək. Bu manevrlərə NATO-nun Baltikyanı ölkələrdə, Rumıniya və Polşada beş yeni hərbi bazasının yaradılması da daxildir. Bütün bunlar göstərir ki, Qərbin Rusiyaya qarşı təzyiqi yeni bir müstəviyə keçir. Bu arada Minskdə Rusiya ilə Ukrayna arasında atəşkəs rejimi ilə bağlı Putinin yeddi bəndlik layihəsinin müzakirəsindən heç otuz saat keçməmiş atəşkəsin pozulması bunun kövrək bir razılaşma olduğunu göstərdi. Belə bir vəziyyətdə ABŞ Dövlət katibi Con Kerrinin təşəbbüsü ilə Azərbaycan və Ermənistan dövlət başçılarının görüşü keçirildi. Çox maraqlıdır ki, avqustun 10-da Vladimir Putin də belə bir görüş keçirmişdi. Görüşə digər həmsədr ölkələr dəvət olunmadı və bu, payızda növbəti görüşün olacağını ortalığa qoydu. Eyni ilə Kerri də Fransa və Rusiyanı təşkil etdiyi görüşə dəvət etmədi. Sentyabrda isə ABŞ-ın vasitəçiliyi ilə BMT Baş Assambleyası səviyyəsində Əliyev və Sərkisyanın görüşü olacaq. Bunun ardından isə oktyrabrda Ollandın başçılığı ilə növbəti görüş gözlənilir".

E.Nəsirovun sözlərinə görə, bütün bunlar Qərb, ABŞ və Fransanın Rusiya ilə qarşıdurmanı Qarabağ münaqişəsi fonunda həyata keçirdiyini və bu tendensiyanın məsələnin həllini mürəkkəbləşdirəcəyini sübut edir:

"Payızda Putinin Azərbaycan və Ermənistan prezidentləri ilə görüşmək istəməsi, Fransanın bu analoji addımı təkrarlaması ona dəlalət edir ki, Qərblə Rusiyanın bu konfrontasiyası Azərbaycan və Ermənistan arasında məsələnin həllinə neqativ təsir göstərəcək. Görüşlərin kəmiyyəti baxımından irəliləyiş olsa da, keyfiyyət cəhətdən hesab edirəm ki, heç bir dəyişiklik olmayacaq".