"Türkiyənin Mosul konsulluğu personalının 101 gün davam edən çiləsinə son qoyulması faktı həqiqətən sevindiricidir. Allah bir də belə sıxıntı nəsib etməsin. Hamısı sağ-salamat evinə döndü".

Axar.az xəbər verir ki, bu sözləri millət vəkili Fazil Mustafa türk diplomatlarının azad olunması olayını şərh edərkən bildirib. Millət vəkili onların MİT-in əməliyyatı ilə girovluqdan qurtarıldığına inanmadığını da qeyd edib:

"Onların MİT-in əməliyyatı nəticəsində azad olunması inandırıcı görünmür. Çünki həmin bölgələrdə hələ ki, İŞİD məğlub edilməyib və o qədər insanı rahatlıqla bu terrorçu gücün əlindən çıxarmaq imkansız görünür. Hansısa razılaşmanın olmasını istisna etmirəm. Ola bilsin ki, bu, Türkiyənin koalisiyaya qoşulmamaq barədə addımına İŞİD-ın cavab jestidir. Ancaq bundan sonra Türkiyənin işi daha da çətinləşəcək".

Fazil Mustafanın fikrincə, Türkiyə həddə artıq çətin seçim qarşısındadır:

"Koalisiyaya qoşulsa, PKK və Peşmərgə ilə eyni mövqedə hərəkət etməli olacaq, bu isə bir çox hallarda Türkiyənin faydasına olmaya bilər. Qoşulmasa da adı hər zaman İŞİD-ə dəstək verən ölkə kimi çəkiləcək və lüzumsuz təzyiqlərlə üz-üzə qalacaq. Hazırda Türkiyənin İraqda oynaya biləcəyi türkman kartı da xeyli zəiflədi və bundan sonra nə baş verəcəksə, bu, əsasən, kürdlərin mövqeyinin daha da güclənməsinə gətirəcək. PKK-nın məktəbləri yandırması faktları da göstərir ki, çözüm sürəcinin də sakit məcrada davam etmə perspektivi yoxdur. Ümid edək ki, qardaş ölkəmiz bu ilğımdan da itkisiz və yara almadan çıxacaq".