Əkrəm Feyzi Tərzioğlu Axar.az-ın oxucularına yaxşı tanışdır. O, İraq-Türkman Yazıçılar Birliyinin sədri, İraq Parlamentinin keçmiş millət vəkili, Dünya Azərbaycanlıları Konqresinin İdarə Heyətinin üzvüdür. Azərbaycana tez-tez gəlir. Bu dəfə Bakıya Beynəlxalq Humanitar Forumda iştirak etmək üçün gəlmişdi.

Oktyabrın 3-də Beynəlxalq Mətbuat Mərkəzində Azərbaycan Dil Qurumu İctimai Birliyinin keçirdiyi növbəti tədbirdə iştirak edən Ə.F.Tərzioğlu yaşadığı bölgənin terrorun qurbanı olmasından, İŞİD adlanan qondarma dövlətin törətdiyi qətllərdən bəhs etdi. Adı çəkilən "dövlətin" ABŞ-ın vitse prezidenti Co Baydenin xüsusi təlimatlarına görə, Türkman elində və digər ərazilərdə qətllər törətdiyindən söz açan Feyzi bəy dünya ictimaiyyətinin bu olaya biganə qalmasından da danışdı. Tədbir sonu fürsət tapıb ona bir neçə sualla müraciət etdik.

Axar.az-ın suallarını cavablandıran Əkrəm bəy İslam dünyası üçün müqəddəs məkanlardan olan Kərbəlada da terror hadisələrinin törədildiyindən, partlayışların baş verməsindən ürək ağrısı ilə söz açdı:

- Hər gün acı xəbərlər eşidirik. İraq türkmənlərinə qarşı genosid edilir. Bundan çox əzab çəkirik. Minlərlə insanımız qətl edilib. Yüzlərlə çocuğumuz atasız, qadınlarımız dul, analarımız övladsız qalıb.

- Əkrəm bəy, mətbuatdan İraq türkmanlarının durumu hər kəsə aydın idi. Son vaxtlar Qərb və Avropa İŞİD-ə qarşı birgə əməliyyatlar keçirir. İndi durum necədir?

- Vəziyyət indi də gərgindir. İŞİD Amerikanın vitse-prezidenti Co Baydendən aldığı təlimat üzrə qətllər, dağıntılar, partlayışlar törədir. 3 milyonluq İraq türkmanlarına qarşı haqsızlıqlar dayanmadan davam edir. Dilafərdən Bəsrəyə qədər olan məsafədə vəziyyət daha acınacaqlı, ürəkağrıdıcıdır. Böyük Füzulinin uyuduğu Kərbala torpağı terror nəticəsində tamam dağılmaq üzrədir.

Əkrəm bəy İraqın Keçmiş baş naziri Nuri əl-Malikinin yürütdüyü siyasətlə də bağlı fikirlərini bizimlə bölüşdü:

- Maliki xalqın seçimi ilə hakimiyyətə gəlmişdi. O, vəzifəsindən getdikdən sonra yeni gələn rəhbəri də xalq seçdi. Amma Malikiyə görə üsyan qaldıranlar, İŞİD-çilər geri çəkilmədilər. Yenə də ərazidə qətllər törədirlər. Təbliğatları da güclü oldu. Media istəsə ağı qara rəngdə verə bilər. Verir də. Dünya mətbuatı İŞİD üsyanının Malikiyə görə baş verdiyini desə də, əslində bu, belə deyil. Onlar İraqın bütövlüyünün əksinə gedir, Bölgədə Sünnistan, Şiəistan və Kürdüstan yaratmaq niyyətindədirlər. Bu gün ən çox əziyyət çəkən isə türkmanlardır. İndi tədbirdə təhsildən bəhs olundu. Azərbaycanın aydınları danışdı. Çox istərdim ki, İraq türkmanları Azərbaycanda təhsil alsın, maariflənsin. Biz axı qardaşıq.

- Əkrəm bəy, siz çıxışınızda Türkiyə dövlətindən giley etdiniz.

- Bizim gileyimiz təkcə Türkiyə cümhuriyyətindən deyil. Bütün türk dünyasından gözləntilərimiz var. Türkiyə Fələstinə, ərəb ölkələrinə necə sahib çıxırsa, bizə də elə sahib çıxmalıdır. Ümidimiz türk dünyasınadır. Azərbaycanadır. Bütün sahələrdə, həm isqtisadi, həm mənəvi, həm də hərbi yardımlar edilməlidir.

- Hərbi müdaxilə dediniz, axı bu bir ölkənin ərazisinə digər bir ölkənin qanunsuz hərbi müdaxiləsi kimi anlaşılacaq.

- Bizim yüzlərlə yaralılarımız var. Aclıq və səfalət müharibənin gətirdiyi bəladır. Türkiyə ərəblərə sığınacaq verir, onların yaralılarını müalicə edir, heç olmasa bizlərə də bunun yarısını etsəydi. Amma biz bunu gözləsək də, umsaq da bu yoxdur. Bilirsiz ki, Kərkük türkmanların çox sıx yaşadığı bir ərazidir. Bura neftlə zəngindir. Türkmanları məhv etməklə bu yerləri Kürdüstana vermək istəyirlər. Baxın, əslində müharibə bu yerlərə sahib olmaq uğrunda gedir. Amerika, Almaniya, İtaliya və bir çox ölkələr indi İŞİD-i bombalayır, ona görə ki, İŞİD Kürdüstana qarşı da vuruşur. Bu ölkələr Kürdüstanı qoruyur.

- Sizin dərdləriniz bizə doğmadır. Eyni acını yaşayırıq.

- Elədir. Azərbaycan da bölgədə təklənmiş bir ölkədir. Torpaqlarının 20 faizi işğal olunub. Arzu edirik ki, torpaqlarımız işğaldan azad olsun.