"Rusiyanın Azərbaycanı Gömrük İttifaqına dəvətinin altında heç bir Qarabağ vədi yer almır".

Bu sözləri Axar.az-a Təhlükəsiz Enerji Tədqiqat Mərkəzinin rəhbəri Ceyhun Mahmudlu son günlər Azərbaycanın Avrasiya İttifaqına daxil olması ilə Qarabağın qaytarılması məsələsinin yenidən gündəmə gəlməsinə münasibət bildirərkən deyib. Politoloqun sözlərinə görə, Avrasiya İttifaqı ilə bağlı bugün Azərbaycanın heç bir rəsmi mövqeyi yoxdur və hökumətin gündəmində belə bir məsələ yer almır:

"Gömrük Birliyinə daxil olmaq inteqrasiyanın ilkin mərhələsidir. İnteqrasiya isə bərabər səviyyəli ölkələr arasında ola bilər. Yəni qarşılıqlı münaqişə problemi olan ölkələrin eyni birlikdə hər hansı bir inteqrasiyanı formalaşdırması qeyri-mümkündür. Bugün Ermənistan Avrasiya İttifaqına daxil olub və gələcəkdə Azərbaycanın da daxil olması, iki ölkə arasında effektli mübasibətlərin qurulması üçün öncəliklə Dağlıq Qarabağ münaqişəsinin həll edilməsi əsas şərtdir. Çünki Gömrük Birliyinə qoşulan dövlətlər arasında gömrük tariflərindən azad olma, güzəştlərin tətbiq edilməsi kimi önəmli məsələlər var. Əgər iki dövlət arasında münaqişə mövcuddursa və iqtisadi münasibətlər yox səviyyəsindədirsə, burda hansı inteqrasiyadan söhbət gedə bilər? İttifaqa daxil olan ölkələr arasında rejim və münasibətlər eyni anda tətbiq edilməldir. Əks təqdirdə bunun effektivliyindən heç söhbət belə gedə bilməz. Azərbaycanın nə Gömrük İttifaqına üzv olması, nə də Dağlıq Qarabağ məsələsinin bu cür yolla həlli mümkün deyil. Avrasiya İttifaqı Rusiyanın Ermənistan və Azərbaycanı asılılıqda saxlamaq üçün qurulan bir oyunudur və təəssüf ki, bu oyunun sonunda Qarabağ mükafatı olmayacaq".