Azərbaycan Ordusunun günü-gündən artan hərbi potensialı və qüdrəti Ermənistana məlumdur.

Axar.az xəbər verir ki, bu sözləri İrəvanda Rusiya və Ermənistanın siyasi dairələrinin nümayəndələrinin iştirakı ilə keçirilən yeni yaradılmış “Lazarev klubu”nun ilk iclasındakı çıxışlar zamanı səsləndirilən fikirlərə münasibət bildirən analitik Ehtiram Aşırlı deyib. O bildirib ki, hətta bu iclasda Vladimir Yevseyev çıxışı zamanı Azərbaycan Ordusunun hərbi potensial və qüdrəti baxımından Ermənistan ordusundan nə dərəcə üstün olduğuna dair önəmli məqamlara toxunub:

“Yevseyev çıxışı zamanı Azərbaycanın hərbi gücünün istər kəmiyyət, istərsə də keyfiyyət baxımından Ermənistandan daha üstün olduğunu qeyd edib. V.Yevseyev məhz Rusiyanın Ermənistana verdiyi “İsgəndər” əməliyyat-taktiki raket komplekslərinin bu ölkəni Azərbaycanın təhdidlərindən qoruduğunu xüsusilə diqqətə çatdırıb. Yevseyevin belə bir fikirlərlə çıxış etməsinin arxasında duran bir neçə əhəmiyyətli səbəblər var. Təbii ki, biz Yevseyevin belə bir fikirlə çıxış etməsini Rusiya hökumətinin Ermənistan rəhbərliyi ilə bağlı yaranmış narazılıqdan irəli gəldiyini ifadə edə bilərik. Çünki son zamanlar Ermənistanda Rusiya əleyhinə geniş təbliğatlar aparılır ki, bu da Moskvanı və orada yaşayan erməni lobbisini narahat etməyə bilməz. Xüsusilə bir məqamı diqqətinizə çatdırmaq istərdim ki, ABŞ-ın Los-Anceles şəhərində keçirilən “Hayastan” ümumerməni fondunun illik telemarafonu zamanı Rusiyada yaşayan erməni lobbisi tərəfindən heç bir maliyyə yardımı göstərilmədi. Bir sözlə, Yevseyev öz çıxışıyla Rusiyanın təsir dairəsindən ayrılıb Qərbə meyil etmək istəyən hazırkı Ermənistan rəhbərliyinə xatırlatmağa çalışdı ki, bu günə qədər sizi Azərbaycan Ordusunun gücündən və təhdidlərindən qoruyan Rusiya idi, lakin siz Qərbə doğru getməyə davam etmək istəyirsizsə, o zaman öz ölkənizin məhv olmasını izləyəcəksiniz”.