Ötən gün İranın Bakıdakı səfirliyi Bəhram Feyzin adlı
İran vətəndaşının saxlanma şəraitindən şikayət edərək, onun
həbsxanada aclıq aksiyasına başladığını bəyan edib. Bir müddət
əvvəl də Bakıda həbsdə olmuş digər İran vətəndaşı Həsən Fərəci
ailəsinə saxlanıldığı həbsxanadan şikayət etmişdi.
Hüquq Müdafiə Təşkilatları Monitorinq Qrupunun üzvü, millət
vəkili Çingiz Qənizadə saytımıza açıqlamasında bu məlumataların
yalnış olduğunu bildirib və İranın Bakıdakı səfirinə müraciət
edərək onu iran vətəndaşlarının həbsdə olduğu cəzaçəkmə
müəssisələrinə birgə baş çəkməyə çağırıb.
AzVision.az Çingiz Qənizadənin təklifinə cavab almaq üçün İranın
Bakıdakı səfirliyi ilə əlaqə saxlayıb. Səfirliyin mətbuat
xidmətindən bildirilib ki, onlar da deputatın görüş təklifinə
müsbət yanaşırlar.
"Bizim yaydığımız məlumatda, İran İslam Respublikasının
Azərbaycandakı səfirliyinin baş konsulu Möhsün Mövlayi İran
vətəndaşı Bəhram Feyzinin səfirlik nümayəndəsi ilə görüşü ilə bağlı
məlumat qeyd olunub. Lakin bu barədə bir neçə dəfə nota təqdim
etməyimizə baxmayaraq, hələ də məsələ təmin edilməyib. Biz də
vətəndaşımızla görüşüb, onun saxlanma şəraiti ilə tanış olmaq
istəyirik. Amma icazəsiz necə gedib, görüşə bilərik?".