Məğlub Paşinyan bununla özünə bəraət qazanmaq istəyir.

Bu sözləri Axar.az-a Ermənistanın Təhlükəsizlik Şurasının iclasının ilk dəfə olaraq Xankəndidə keçirilməsinə aydınlıq gətirən millət vəkili, politoloq Rasim Musabəyov deyib. Deputat bildirib ki, separatçıları danışıqlar masasına qaytarmaq siyasəti iflasa uğrayan Paşinyan çarəsizlikdən belə bir addım atıb:

“Paşinyan hər yerdə durmadan zarıyırdı ki, Dağlıq Qarabağı danışıqlar masasına qaytaracaq. Ancaq Nikol bugünlərdə yerində otuzduruldu və onun danışıqlar formatını dəyişdirmək cəhdi iflasa uğradı. Qarabağ məsələsinin tənzimlənməsi ilə bağlı danışıqlar Azərbaycanla Ermənistan arasında aparılacaq. İndi Paşinyanın hünəri varsa, bunu pozsun. Çox aciz bir durumda qalan Paşinyan separatçıları masa arxasına qaytarmağın mümkünsüzlüyünü anladığından çıxış yolunu Ermənistanın Təhlükəsizlik Şurasının iclasını Xankəndidə keçirilməkdə görüb. Görünür, o, məğlubiyyəti heç cür həzm edə bilmir, ona görə də belə bir addım atmaqla özünə bəraət qazanmağa və guya danışıqları hələlik Qarabağ ermənilərinin adından aparmağa dair icazə aldığını nümayiş etdirməyə çalışır”.

Qeyd edək ki, ilk dəfə olaraq Ermənistan Təhlükəsizlik Şurasının iclası bu gün Azərbaycanın işğal altında saxlanılan Xankəndi şəhərində keçiriləcək.