Fevralın 9-da BAXCP-nin mərkəzi qərargahında BAXCP sədri, millət vəkili Qüdrət Həsənquliyev Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının nəzdində yaradılan İşçi Qrupunun üzvləri – Niyaməddin Orduxanlı, Azər Həsrət, Mayis Əliyev, Məhluqə Qaramanlı, Çingiz Bayramov, Mehriban Abdullayeva və Xanım Əhmədzadə ilə görüş keçirib.

Axar.az xəbər verir ki, BAXCP sədrilə görüşün məqsədi BMT Təhlükəsizlik Şurasına müraciət üçün "Sarkisyanın hərbi cinayətkar kimi tanınması" və 20 Yanvar hadisəsinə dünya ictimaiyyəti tərəfindən siyasi qiymət verilməsi təşəbbüsü ilə yaradılan petisiyadır.

QHT sədri Niyaməddin Orduxanlı bildirib ki, İşçi Qrupu millət vəkili və partiya sədri kimi Q.Həsənquliyevin dəstəyini almaq istəyir.

Qüdrət Həsənquliyev bu işin əhəmiyyətini vurğulayıb və dəstəyə hazır olduğunu bildirib:

"Təşəbbüsünüzü çox yüksək qiymətləndirirəm. Bu işin hansısa nəticə verəcəyini təbii ki, gözləmirik. Çünki əvvəllər də belə təşəbbüslər olub. Ancaq buna baxmayaraq, hər birimiz əlimizdən nə gəlirsə, onu ortaya qoymalıyıq".

Qüdrət Həsənquliyev deyib ki, 10 ildir NATO Parlament Assambleyasında Azərbaycanı təmsil edir:

"Assambleyanın iclaslarından kənarda - kluarlarda həm Amerikanın, həm Avropanın parlamentarilərilə söhbət etmişik. Onlar fasilələrdə daha səmimi olurlar. Çünki yanlarında jurnalist olmur və dedikləri rəsmi stenoqrama düşmür. Həmin görüşlərdə parlamentarilər dəfələrlə bildiriblər ki, Dağlıq Qarabağ probleminin həlli Rusiyadan asılıdır. Deyiblər ki, problemi Rusiya ilə danışıb həll edin. Bəziləri hətta açıq formada vurğulayıb ki, onların ermənilərlə kültrəl yaxınlığı var.

Sonuncu dəfə Vilnüsdə NATO Parlament Assambleyasının iclasında rusların tədbirə dəvət olunmamasının səbəbini soruşdum və həm də bildirdim ki, düz eləmisiniz, çünki Rusiya işğalçı dövlətdir və Ukraynanın ərazilərini zəbt edib. Eyni zamanda, söylədim ki, BMT Baş Məclisində, Sülh Naminə Tərəfdaşlıq Proqramı çərçivəsində NATO ilə əməkdaşlıq edən və NATO Parlament Assambleyasının assosiativ üzvü olan Ermənistan yeganə ölkədir ki, başqa bir assosiativ üzvün ərazi bütövlüyünə səs vermir. Siz isə sanki heç nə baş verməmiş kimi bu fakta etinasız yanaşırsınız. Bildirdim ki, bu qədər haqsızlıq, ədalətsizlik olmaz. Ən dəhşətlisi o idi ki, mənim çıxışımdan sonra Ukraynadan olan nümayəndələr özlərində cəsarət tapıb fikrimi təsdiqləmədilər ki, Azərbaycan nümayəndə heyəti düz deyir, ermənilər bizim ərazi bütövlüyümüzə səs verməyiblər. Çünki bilirdilər ki, ümumi vəziyyət ermənilərin xeyrinədir. Və əsas aparıcı dövlətlər bu məsələdə maraqlı deyillər ki, Ermənistanın belə addımı hansısa formada pislənilsin. Və yaxud hansısa bir qətnaməyə salınsın.

Bunları deməkdə məqsədim odur ki, biləsiniz - Qərbdə açıq-açığına bizə qarşı ədalətsiz münasibət var. Bəzən olur ki, Qərb və Avropa mətbuatında tək-tük halda yazılar verilir. Bunu da ədalətli olduqlarına görə deyil, təmənna güddükləri üçün edirlər. Ancaq buna baxmayaraq, o fikrdəyəm ki, hər zaman biz onları vicdanlarıyla üz-üzə qoymalıyıq. Eyni zamanda, öz ictimaiyyətlərinə göstərməliyik ki, budur, sizin siyasətçilərinizin ədaləti, prinsipiallığı!"