Son zamanlar ABŞ-la İran arasında olan gərginliyin artması, sanksiyalar rejiminin güclənməsi müəyyən dərəcədə Ermənistanda Tehran şirkətlərinin fəaliyyətində məhdudiyyətlər yaradacaq. İrəvan yaxşı başa düşür ki, ABŞ sanksiyalarını nəzərə almadan İran şirkətləri ilə əlaqəni saxlasa, Vaşinqton tərəfindən ciddi cəzalana bilər.

Bu sözləri Axar.az-a açıqlamasında iqtisadçı ekspert Natiq Cəfərli ABŞ-la İran arasında olan gərginliyin Ermənistana təsirindən danışarkən deyib. O bildirib ki, Ermənistanın iqtisadi vəziyyətinin pisləşməsi ümumi sosial vəziyyətə ciddi təsir göstərəcək:

“Ermənistanla İran arasında iqtisadi əlaqələr illərdir mövcuddur. Əsasən enerji daşıyıcıları, investisiya və turizm axını baxımından İran Ermənistan üçün mühüm rol oynayır. Ermənistanda İrandan gələn turistlərin sayı ilk üçlükdə olub hər zaman. Yəni Ermənistanın bir çox iqtisadi gəlirlərində İranın böyük rolu var.

Bu baxımdan İrana sanksiyalar gücləndikcə Ermənistanda ciddi fəsadlar qaçılmazdır. Artıq bəzi xəbərlərə görə, İranla yaşanan gərginlik Ermənistana təsir edib və bu təsir artmaqdadır”.

İqtisadçı bildirib ki, sanksiyalar siyahısına daxil olan şirkətlərin Ermənistan ərazisində fəaliyyət göstərməsinə ABŞ ciddi yanaşır:

“Hətta ABŞ sonuncu sanksiyaları tətbiq edərkən belə bir bənd də əlavə etdi ki, sanksiyaya düşmüş İran şirkətləri üçüncü ölkə ərazisində fəaliyyətini davam etdirərsə, həmin üçüncü ölkə şirkətləri də bu sanksiyalara məruz qala bilər. Yəni Ermənistan İranla əməkdaşlığı davam etdirsə də, etdirməsə də, bu problemdən qaça bilməyəcək. Belə ki, iqtisadi əlaqələri dayandırsa ziyanınadır, davam etdirsə isə ABŞ təzyiqi ilə üzləşəcək”.

Ekspertin sözlərinə görə, Ermənistan iqtisadiyyatının zəifləməsi işğal altında olan Dağlıq Qarabağa ciddi təsir göstərəcək:

“Qondarma Dağlıq Qarabağın maliyyə resurslarının böyük əksəriyyəti Ermənistandan daxil olur. Bu baxımdan İrəvanın maliyyə çətinlikləri artdıqca bunun şübhəsiz ki, qondarma rejimə də ciddi təsirləri olacaq. Bu da təbii ki, həm qondarma rejimdə, həm də Ermənistanın özündə ciddi narazılıqlara səbəb olacaq”.