Vladislav Surkovun istefası Ukraynada sülhü bərpa etməyəcək.

Bu sözləri Axar.az-a açıqlamasında politoloq Elxan Şahinoğlu Rusiya Prezidentinin köməkçisi Vladislav Surkovun istefasını şərh edərkən deyib. Onun sözlərinə görə, Vladislav Surkovun işdən uzlaşdırılması o demək deyil ki, Moskva Donbas separatçılarına dəstəkdən imtina edəcək:

“Surkov uzun illər Ukrayna separatçıları ilə təmas məsələlərinə cavabdeh olub. Rusiya ilə separatçılar arasında rəsmi və qeyri-rəsmi görüşlər keçirib. Separatçıların bütün hərəkətləri, addımları birbaşa Surkovdan gəlirdi. Bu baxımdan Surkov olduqca önəmli bir şəxs idi. Lakin onun vəzifədən getməsi Ukraynadakı münaqişənin həlli demək deyil. Ola bilsin, başqa nöqsanları olub.

İnanmıram ki, Surkovun istefası Rusiyanın Donbas separatçılarına dəstəyinin dayanması və bu siyasətindən imtinası deməkdir. Bu dəstək o vaxtacan davam edəcək ki, Ukrayna separatçıların şərtlərini qəbul edəcək. Lakin Ukrayna hakimiyyətinin separatçılara güzəştə getməsi də real görünmür”, - o bildirib.

Qeyd edək ki, Rusiya Dumasının keçmiş deputatı İlya Ponomaryev Rusiya Prezidentinin köməkçisi Vladislav Surkovun istefasının ardınca Vladimir Putinin “Donetsk Xalq Respublikası” (DXR) və “Luqansk Xalq Respublikası”nı (LXR) Ukraynaya təhvil verəcəyini iddia edib.