Mərkəzi Bankın İdarə Heyətinin 21 fevral 2015-ci il tarixli qərarı ilə manatın məzənnəsinin ABŞ dollarına nisbətən aşağı düşməsi "Veysəloğlu" şirkətinin distribüterlik etdiyi məhsullarda süni qiymət artımına səbəb olmayacaq.

Axar.az xəbər verir ki, bu barədə "Veysəloğlu" şirkətinin İctimaiyyətlə əlaqələr şöbəsinin müdiri İlham Məmmədov məlumat yayıb:

"Şirkətin əsas fəaliyyəti idxal üzərində qurulduğundan ABŞ dollarının məzənnəsinin artması şirkət üçün də təsirsiz ötüşməyəcək. Lakin bu gün hər hansı bir süni qiymət artımından söhbət gedə bilməz. Şirkət distribüterlik etdiyi məhsulları bu gün də köhnə qiymətlərlə topdan və pərakəndə satış mərkəzlərinə təqdim etməkdədir".

İctimaiyyətlə əlaqələr şöbəsinin məlumatına görə, qiymətlərdə baş verə biləcək hər hansı dəyişikliklər şirkətin kommersiya fəaliyyəti ilə bağlı olan cari proseslərdir, hazırda isə heç bir qiymət artımı yoxdur və planlaşdırılmır:

"Bu gün ictimaiyyətdə "Veysəloğlu" şirkəti tərəfindən topdan və pərakəndə satış mərkəzlərinə təqdim olunan məhsullarda qiymət atımının müşahidə edilməsi ilə bağlı həqiqətə uyğun olmayan məlumatlar yer alır.

Pərakəndə və topdan satış mərkəzləri o zaman qiymətləri artıra bilər ki, "Veysəloğlu" şirkəti təqdim etdiyi məhsulların qiymətini artırsın. Bu istiqamətdə isə şirkət rəhbərliyi tərəfindən heç bir qərar qəbul edilməyib.

"Veysəloğlu" şirkəti olaraq topdansatış və pərakəndə satış mərkəzlərinin diqqətinə çatdırırıq ki, bu kimi hallarla rastlaşdıqda şirkətdə yaradılmış 050 254 54 29 qaynar xətt nömrəsinə zəng edərək məlumat versinlər".