Türkiyə ilə Rusiya arasında 10,25 faiz endirimi təmin edən razılaşmanın reallaşmadan ləğv edilməsi müəyyən müzakirələrə yol açıb.

Axar.az xəbər verir ki, BOTAŞ-ın son dəqiqədə müqaviləni imzalamaqdan imtina etməsi ölkə mətbuatının Ankaranın "Türk Axını"ndan sui-istifadə etməsi kimi fikirlər səsləndirməsinə yol açıb.

Nüfuzlu "Kommersant" qəzeti bir addım da önə gedərək "Türk Axını"nın ləğv edilmə təhlükəsinin olduğunu iddia edib:

"Ankara dolların sürətlə artması səbəbindən yerli təbii qaz şirkətlərinin işini asanlaşdırmaq məqsədi ilə "Türk Axını"ndan kart kimi istifadə edir. "Qazprom" endirim razılaşması imzalanmadan öncə ən azından Türkiyə iqtisadiyyatını araşdırmaq niyyətindədir. Türk tərəfi isə layihənin detalı ilə bağlı açıqlama vermir və Azərbaycanın TANAP layihəsini seçir. Bu layihəyə artıq start verildi".

Qəzet Azərbaycanla yeni layihənin başlanmasının ardından "Türk Axını"nın xeyli uzanma ehtimalının olduğunu da gizlətməyib.

Xatırladaq ki, Türkiyənin Enerji və Təbii Sərvətlər naziri Taner Yıldızın yanvarın 1-də təbii qaz razılaşmasının əldə edildiyi və 10,25 faiz endirim olacağı barədə dediyi sözlərə baxmayaraq, müqavilə imzalanmadan ləğv olunub. Kreml rəhbəri Vladimir Putin də dekabrın 1-də Ankara səfərində Türkiyəyə 6 faiz endirim ediləcəyini demişdi.