Millət vəkili Qənirə Paşayeva və araşdırmaçı yazar Mehmet Perinçək Almaniyanın Nürnberq şəhərində başda Atatürkçü Düşüncə Dərnəyi olmaqla Türk və Azərbaycan diaspor təşkilatlarının qondarma erməni soyqırımı yalanlarının Alman cəmiyyətinə daha geniş tanıdılması ilə bağlı "Erməni soqırımı iddiaları və gerçəklər" adlı konfransda geniş məruzə ilə çıxış ediblər.

Axar.az xəbər verir ki, millət vəkili geniş məruzəsində qondarma erməni soyqırımı yalanlarının heç bir tarixi sübuta söykənmədiyi, erməni diaspor və lobbisinin Türkiyə və Türk dünyası əleyhinə apardığı məqsədyönlü iftira, böhtan siyasəti barədə geniş məlumatlar verdikdən sonra Avropa Parlamentinin qondarma erməni soyqırımını tanıyan qərarını qınayıb.

O, bəzi Avropa ölkələrinin də bununla bağlı aldığı qərarları kəskin tənqid edərək onların bu məsələdən öz maraqları üçün istifadə etdiyini bildirib:

"Ermənistanın apardığı etnik təmizləmə siyasəti, Dağlıq Qarabağ probleminin tarixi kökləri və bugünkü vəziyyət, Xocalı soyqırımı ilə bağlı da geniş çıxış edən millət vəkili bildirib ki, 20 ildən artıq vaxt keçməsinə baxmayaraq, bu günə qədər ATƏT-in Minsk Qrupu həmsədrləri münaqişənin həlli istiqamətində heç bir ciddi addım atmayıblar. İşğalçı Ermənistana bunun üçün heç bir təzyiq göstərilmir. 22 ildən çoxdur ki, 100 minlərlə azərbaycanlı qaçqın və məcburi köçkünlər öz evlərinə qayıda bilmirlər və bu, Avropa məkanında davam edən ən böyük insan haqları pozuntusudur".

Millət vəkili Almaniya dövlətini və xalqını bu insanlıq əleyhinə cinayəti törədənlərin ədalət qarşısında cavab verməsi üçün səyləri artırmağa və qondarma erməni soyqırımı yalanlarına dəstək verməməyə çağırıb:

"Ermənistanın Xocalıda törətdiyi soyqırımın, qətliamın 23 ili tamam olur. Yüzlərlə dinc insan, uşaqlar, qadınlar amansızlıqla qətlə yetirildi, yüzlərlə insan ağır yaralandı, onlarla insan girov götürülərək işgəncələrə məruz qoyuldu, amma təəssüf ki, biz avropalı siyasətçi həmkarlarımızın, liderlərinin bir çoxundan, hətta bu gün də bunu pisləyən, etirazını bildirən açıqlamalar eşitməmişik. Amma 100 il əvvəl olmayan hadisələri araşdıraraq olmayan hadisələrə, yalanlara dəstək verirlər. Harada doğulmasından və yaşamasından asılı olmayaraq hər bir türk insanı qondarma erməni soyqırımı yalanlarına qarşı mübarizə, Xocalı soyqırımı, Qarabağ həqiqətlərinin, Ermənistanın işğal etdiyi Azərbaycan torpaqlarında törətdiyi vandalizm aktlarının dünyaya çatdırılması üçün çalışmalıdır".

O bildirib ki, dünyanın bəzi ölkələri gerçəkləri görmək istəmir və qondarma erməni soyqırımı ilə bağlı qərarlar qəbul edirlər:

"Bu yalanların qarşısının alınmasının tək bir yolu var. Bu, birlikdə mübarizəmizi daha da gücləndirmək və həqiqətləri dünyaya birlikdə daha da geniş yaymaqdır. İddiaların qarşısını almaq üçün həqiqətləri, gerçəkləri bütün dünyaya daha geniş şəkildə çatdırmalıyıq".

Qeyd edək ki, tədbirin sonunda millət vəkili tədbir iştirakçılarına Qarabağ, Xocalı soyqırımı həqiqətləri ilə bağlı kitablar, materiallar hədiyyə edib. Eyni zamanda özünün həmmüəllifi olduğu "Xocalı Soyqırımı şahidlərin dilindən" kitabını imzalayaraq tədbir iştirakçılarına verib".