"Ermənistanın dərdi "soyqırım" yox, dolanışıqdır".

Axar.az xəbər verir ki, bu açıqlama ilə türkiyəli jurnalist Perihan Çakıroğlu çıxış edib. O, Ermənistanda iqtisadi vəziyyətin ağır olduğunu və buna görə də "soyqırım" siyasəti aparmaqla Türkiyədən təzminat almağa çalışıldığını bildirib:

"SSRİ-nin dağılmasından bu yana Ermənistanın iqtisadi durumu pisləşib. Uzun illərdir Türkiyəni "soyqırım"la küncə sıxışdıran diaspor Ermənistana heç bir zaman yetərli qədər iqtisadi dəstək verməyib. Məhz bu səbəbə görə Ermənistan Prezidenti Serj Sərkisyan hər dəfə çıxışında "Türkiyə ilə sərhədin açılması çox şeyi dəyişdirəcək" deyir. Bəs sərhədlər açılmasa necə olacaq? Əgər ölən ermənilər geri qayıtmayacaqlarsa, niyə "soyqırım" deyə inad edirlər? Ermənistanın dərdi "soyqırım" yox, dolanışıqdır. Ermənistan Türkiyəyə qarşı gec-tez təzminat məsələsini gündəmə gətirəcək. Çünki ermənilər pul olmazsa, çarxlarını döndürə bilməyəcəklər və iqtisadiyyat çökəcək. Ermənistanın 1,5 milyard dollarlıq ixracatı, 3,5-4 milyard dollarlıq isə idxalı var. Ortadakı fərq çox böyükdür. BVF-dən və AB ilə Rusiya başda olmaqla bir neçə ölkədən alınan maliyyə qaynaqları ermənilərə çatmır. Əkinçilik sektoru çox kiçikdir. Ölkədə süd və süd məhsullarına olan təlabatın yalnız üçdə biri qarşılanır. Ölkənin idxalı oliqarxların əlindədir. Minimum əmək haqqı çox aşağıdır. Bir sözlə, Sərkisyan ikinci prezidentliyi dövründə də xalqın dolanışıq problemlərini və işsizlik məsələsini həll edə bilmədi. O, buna görə də son ümidini Türkiyəyə bağlayıb".