BMT Təhlükəsizlik Şurasının 1993-cü il noyabrın 12-də qəbul etdiyi 884 saylı qətnamədə Azərbaycanın Zəngilan rayonunun və Horadiz şəhərinin işğalı pislənilir və işğalçı qoşunların həmin ərazilərdən dərhal çıxarılması tələb edilir. Ordumuz BMT-nin sözügedən qətnaməsinin icrası ilə məşğuldur.

Bunu Axar.az-a beynəlxalq hüquq üzrə professor Fərhad Mehdiyev deyib.

O bildirib ki, BMT-nin qəbul etdiyi 4 qətnamənin güclü və əskik cəhətləri var idi:

“Zəif cəhəti ondan ibarətdir ki, bu qətnamələr BMT nizamnaməsinin 7-ci fəslinə uyğun olaraq qəbul edilməyib. Belə ki, 7-ci fəslə uyğun olaraq qəbul edilən qətnamələrin icrası məcburi xarakter daşıyır.

Bununla belə, ATƏT-in Minsk Qrupunun iclasında razılaşdırılmış BMT Təhlükəsizlik Şurasının 822, 853, 874 884 saylı qətnamələri BMT nizamnaməsinin 6-cı fəslinə uyğun olaraq qəbul edilib. Adı keçən bu qətnamələr işğal edilən torpaqların Azərbaycana məxsus olduğunu birmənalı olaraq təsdiqləyir. Bu isə çox vacib və əhəmiyyətli məqamdır. Eyni zamanda işğalçı qüvvələrin oradan dərhal çıxarılması da açıqca qeyd olunub.

Bununla bağlı Avropa İnsan Hüquqları Məhkəməsinin, AŞPA Avropa Parlamentinin müvafiq qərarları var. Bu qətnamələr olmasaydı belə, Azərbaycan işğal edilmiş torpaqlarını geri qaytara bilərdi. Sadəcə, bu qətnamələr bizim əlimizi daha da gücləndirir.

Onu da deyim ki, bu gün Azərbaycan heç də BMT-nin müvafiq qətnamələrini əsas gətirərək yox, qurumun nizamnaməsinin 51-ci maddəsinin ona verdiyi səlahiyyətlər əsasında öz torpaqlarınının azad edilməsi prosesini həyata keçirir”.