"Bu yaxınlarda ulu öndər Heydər Əliyevin anadan olmasının 92-ci ildönümü ilə əlaqədar YAP Yasamal rayon təşkilatı tərəfindən şahmat və dama oyunları təşkil olunacaq. Oyunların qalibi olacaq şəxslərə mükafatları isə mayın 9-da təqdim etməyi düşünürük".

Axar.az xəbər verir ki, bu sözləri Yeni Azərbaycan Partiyasının (YAP) Yasamal rayon təşkilatının aparat rəhbəri, Azərbaycan Dama Federasiyasının vitse-prezidenti, Bakı Metropoliteninin sabiq rəisi Tağı Əhmədovun Publika.az-a eksklüziv müsahibəsində deyib.

Qarşıdan gələn parlament seçkilərinə indidən hazırlaşdığı və artıq namizədliyini irəli sürəcəyi barədə xəbərlərə aydınlıq gətirən T.Əhmədov vurğulayıb ki, bu barədə ümumiyyətlə düşünməyib:

"Bu haqda mənim nə ağlıma bir şey gəlib, nə də yuxumda görmüşəm. Namizədlik seçkilərə start veriləndən sonra irəli sürülür. İnşallah, parlament seçkilərinə də uğurla start veriləcək. İndidən arxı atlamaq doğru deyil".