Ana səhifə Gündəm |
"Ərdoğana yaxın olan partiyaların yeni seçkilərlə bağlı iddialar ortaya atması ortalığa bəzi mürəkkəbliklər çıxarır".
Bu barədə Axar.az-a açıqlamasında politoloq Qabil Hüseynli deyib. Sabiq dövlət müşaviri bəzi siyasilərin ortalığı qarışdıracağını istisna etməyib:
"AKP-nin təkbaşına partiya qurmaq imkanı yoxdur. Belə olan halda hökumət hansısa partiya ilə ortaq koalisiyaya getməli, ya da kənara çəkilərək təşəbbüsü digər partiyalara verməlidir. Burada mürəkkəbliklər çoxdur. Çünki hələ seçki gününün sabahı Ərdoğana yaxın olan partiyalar yeni seçkilərlə bağlı iddialar ortaya atmağa başlayıb. Bu, o deməkdir ki, siyasilər ortalığı qarışdıracaq və koalisiya imkanlarını, necə deyərlər, əngəlləməyə çalışacaqlar. Bu nöqteyi-nəzərdən də zənnimcə, AKP hələ ki, koalisiyaya hazır deyil. Bu, açıq-aydın görünür. Hökumətin bəzi məsul şəxslərinin açıqlamalarından da göründüyü kimi, koalisiya qurulmasının istisna edilməsi və yeni seçkilərin keçirilmə ehtimalının yüksəkliyi barədə danışılması göstərir ki, kimlərsə bu seçkiləri yenidən keçirməyə cəhd edəcək".
Politoloq yeni seçkilərin keçirilməsini mümkünsüz hesab edir:
"Çünki dövlət artıq çox böyük vəsait xərcləyib, insanlar az qala iki ilə yaxındır ki, meydanlardadır. Güman edirəm ki, siyasi partiyaların başçıları-CHP, MHP və eləcə də kürdlərin partiyası HDP bu məsələni dəyərləndirəcək və tezliklə hökumət qurulmasını təmin edəcək, eyni zamanda, kimlərinsə yeni avantüralara baş vurmasına imkan verməyəcəklər. Yəqin ki, koalisyon hökumət məclis başqanı seçildikdən sonra qurulacaq. Əgər Davudoğlu Ərdoğandan müəyyən məsafə saxlaya bilsə, birincisi, MHP-ni öz tərəfinə çəkməklə onunla koalisiya qura və ya ikinci variantda isə MHP-CHP-AKP şəklində hökumət qura biləcək. Ərdoğan buna da maneə olmağa çalışacaqsa, onda yeganə yol CHP-MHP-HDP üçlüyüdür. Milliyyətçi Hərəkat Partiyasının kürd partiyası ilə heç bir şəkildə əməkdaşlığa getməyəcəyini nəzərə alsaq, onda çox çətin bir mənzərə ilə qarşılaşdığımızı görərik".
Tarix
2015.06.08 / 11:52
|
Müəllif
Aygün Yusibova
|