Prezident İlham Əliyevin iştirakı ilə videoformatda keçirilən müzakirələr hərtərəfli və obyektiv idi. İlham Əliyev Dağlıq Qarabağ məsələsi və işğaldan azad olunmuş ərazilərlə bağlı Azərbaycanın haqlı mövqeyini sübut etdi.

Axar.az xəbər verir ki, bu sözləri Nizami Gəncəvi Beynəlxalq Mərkəzi ilə Azərtac-ın birgə layihəsi çərçivəsində İslam Təhsil, Elm və Mədəniyyət Təşkilatının (İSESCO) sabiq Baş direktoru, Beynəlxalq Mərkəzin üzvü Əbdüləziz Osman əl-Tuveycri söyləyib.

Mayın 20-də Nizami Gəncəvi Beynəlxalq Mərkəzinin Azərbaycan Prezidenti İlham Əliyevin iştirakı ilə keçirdiyi “Cənubi Qafqaz: Regional inkişaf və əməkdaşlıq perspektivləri” adlı müzakirələrdə iştirak edən Əbdüləziz Osman əl-Tuveycri deyib:

“Prezident İlham Əliyevin ona ünvanlanan suallara cavabları aydın və səmimi idi. O, Cənubi Qafqaz ölkələrinin daxil olduğu dinc və firavan regionun yaradılması üçün bir yol xəritəsi təqdim etdi. Nizami Gəncəvi Beynəlxalq Mərkəzi bu baxımdan maraqlı tərəflər arasında etimadın möhkəmləndirilməsinə xidmət edən, eləcə də harmoniya və əməkdaşlıq üçün zəmin yaradan həqiqi dialoqun aparılması işində konstruktiv rol oynaya bilər”.