Zəngəzur dəhlizinin və yeni kommunikasiyalarının açılması demək olar ki, artıq razılaşdırılıb.

Bu sözləri Axar.az-a açıqlamasında iqtisadçı-ekspert Natiq Cəfərli Ermənistan rəsmilərinin “dəhliz” ifadəsindən qətiyyətlə qaçması, ancaq sovet dövründəki kommunikasiyaların bərpasına razı olduqları haqda açıqlamalarını şərh edərkən deyib.

“Məlum məsələdir ki, hər bir ölkə daha çox öz maraqları çərçivəsində bunun həyata keçirilməsinə çalışır. Rusiyanın, Azərbaycan və Türkiyənin maraqları açıq-aydın şəkildə görünür, çünki bizim üçün çox böyük bir layihədir. Bu layihə ilə bağlı Ermənistanın ambisiyaları, Gürcüstanın isə müəyyən sualları var. Regionda olan ölkələr hərəsi öz marağı çərçivəsində bu layihənin reallaşdırılacağını düşünür və buna çalışır. Onu demək istəyirəm ki, bu dəhliz üçün Ermənistan müəyyən güzəştlər əldə etməyə çalışır və hazırkı bəyanatların da hədəfi budur”, - N.Cəfərli bildirib.

Ekspert qeyd edib ki, necə adlanmasından asılı olmayaraq, bu nəqliyyat marşrutunun açılması sadəcə zaman məsələsidir:

“İnanıram ki, yaxın zamanlarda bu dəhlizin açılması ilə bağlı daha hiss edilə biləcək addımları müşahidə edəcəyik”.