“Səkkiz” serialının yayımı bərpa olunub.

Kult.az xəbər verir ki, bu barədə serialın quruluşçu rejissoru və baş rol ifaçısı olan aktyor Hikmət Rəhimov özünün sosial şəbəkə hesabında yazıb.

"Şükür, "Səkkiz" qayıtdı. Yayımı bərpa olundu. Dövlət həm yaradıcı heyətə, həm tamaşaçıların maraq və istəklərinə müsbət cavab verdi. Buna görə həm öz adımdan, həm yaradıcı heyət adından onlara təşəkkürümü bildirirəm. Ədalətli qərar verən, Azərbaycan kino və serialının inkişafını dəstəkləyən hər kəsə sonsuz minnətdarıq. Qoyulan hər bir senzura qadağası incəsənətin inkişafına maneə olan amildir. Biz bütün qanunlara hörmətlə yanaşırıq”, - rejissor bildirib.

Onun sözlərinə görə, şənbə günü, yanvar ayının 24-ü, saat 23:00 da ARB telekanalında serialın ikinci bölümü nümayiş olunacaq.

Qeyd edək ki, 10 yanvar tarixində "Səkkiz" serialında personajlardan biri söyüş məzmunlu ifadələrdən istifadə etdiyi və yayım zamanı bu səsləndirmə texniki vasitələrlə məhdudlaşdırılmadığı üçün ARB telekanalının yayımı 3 saatlıq dayandırılmışdı. Daha sonra serialın yayımının dayandırılması barədə qərar verilmişdi.