Dünən Sankt-Peterburq Dövlət Universitetində (SPbU) İlham Rəhimovun büstünün açılışı olub.

Kult.az Bakupost.az-a istinadla xəbər verir ki, tədbirdə SPbU rektoru Nikolay Kropacyev, Hüquq fakültəsinin dekanı Sergey Olennikov, həmçinin Rəhimovun ailə üzvləri və tələbə yoldaşları iştirak edib.

İlham Rəhimovun 75 illik yubileyinə həsr olunan açılışda çıxış edən rektor Nikolay Kropacyev bildirib ki, biz yalnız keçmiş böyük hüquqşünas məzunlarımızı xatırlamır, həm də çağdaşlarımızın fəaliyyətinə hörmət göstəririk.

Qeyd edək ki, İlham Rəhimov Leningrad Dövlət Universitetinin (indiki SPbU) 1975-ci il məzunu olub. Onun tələbə yoldaşları arasında Rusiya Prezidenti Vladimir Putin, İstintaq Komitəsinin sədri Aleksandr Bastrıkin və sabiq daxili işlər naziri Vitali Mozyakov kimi məşhur şəxslər var.

"Forbes" məlumatlarına görə, 2014-cü ildə Rəhimovun sərvəti yarım milyard ABŞ dolları dəyərində qiymətləndirilmişdi. O, həmin vaxt Moskva ticarət mərkəzlərində pay sahibi idi: “Evropeyskiy”, “Panorama”, həmçinin “Sadovod” bazarında və “Ukraina” otelində payları vardı.

İlham Rəhimov hüquq elmləri doktoru, Rusiya Elmlər Akademiyasının üzvü və Azərbaycan Respublikasının əməkdar hüquqşünasıdır.