Almaniya ilə İtaliya arasında miqrasiya məsələsi barədə yeni fikir ayrılığı yaranıb. İtaliya Almaniyanın Dublin Qaydalarına əsasən, ölkəyə geri qaytarmaq istədiyi sığınacaq axtaran üç şəxsi qəbul etməkdən imtina edib.

Axar.az xəbər verir ki, bu barədə “Bild” qəzeti məlumat yayıb.

Qəzetin məlumatına əsasən, mübahisənin mərkəzində Almaniyada yaşayan və Avropa Birliyinə İtaliya üzərindən daxil olduğu bildirilən 22 yaşlı Somali vətəndaşı da var. Almaniya tərəfi hesab edir ki, iyunun 12-dən etibarən Dublin Qaydaları çərçivəsində İtaliyaya geri göndərişlər mümkündür. Avropa Birliyinin Miqrasiya və Sığınacaq Paktı məhz həmin gün qüvvəyə minib. Berlinin mövqeyinə görə, Roma müəyyən edilmiş müddətdə sorğuya cavab vermədiyindən geri qəbul üçün razılıq avtomatik verilmiş sayılır.

İtaliya isə bu halların iyunun 12-dən əvvəl yarandığını və yeni qaydaların onlara şamil edilmədiyini bildirir. Romanın mövqeyinə görə, tərəflər köhnə işlərin yenidən hesablanmaması barədə razılığa gəliblər. İtaliya, həmçinin Almaniyadan mümkün kompensasiya tələbini gündəmə gətirib.

Bu mübahisə fonunda Baş nazir Corciya Meloni ölkədə miqrasiyaya qarşı sərt mübarizənin davam etdirildiyini açıqlayıb. O, ölkə daxilində sərt mövqe nümayiş etdirir. Ötən gün miqrantların polis müşayiəti altında təyyarəyə mindiyini göstərən video yayımlayaraq, sərhədlərin qorunmasının, təhlükəsizlik, qaydalara hörmət kursunun qətiyyətlə davam etdiriləcəyini bildirib.

Dublin Qaydalarına əsasən, sığınacaq müraciətləri başqa bir AB ölkəsinin məsuliyyətində olan on minlərlə qaçqın hazırda Almaniyada yaşayır. 2025-ci ildə Almaniya tərəfdaş dövlətlərə təxminən 35 min 900 köçürmə tələbi təqdim edib ki, bunlardan təxminən 23 min 900-ü təsdiqlənib.