ABŞ və Britaniyanın başçılıq etdiyi anqlosakson qrup sərt sanksiyaların və Rusiyanın çökdürülməsinin tərəfdarıdır.

Bu sözləri Axar.az-a açıqlamasında politoloq Turab Rzayev Ukrayna XİN rəhbərinin Rusiyaya sanksiyaların bəzilərinin “işləməməsi” və yeni sanksiyaların tətbiqində ləngimələrlə bağlı narazılığını şərh edərkən deyib.

O bildirib ki, ABŞ-Britaniya xəttindən fərqli olaraq, Avropa Birliyinin siyasi və iqtisadi gücləri sayılan Fransa və Almaniya Rusiyanın tamamilə çökdürülməsinə qarşıdırlar:

“Həmin ölkələr Rusiya ilə ticarətə xüsusi əhəmiyyət verirlər. Buna görə də mümkün qədər Rusiya ilə əməkdaşlıq etməyə çalışırlar”.

T.Rzayevin sözlərinə görə, Rusiyanın tamamilə zəiflədilməsi Mərkəzi Avrasiyada boşluğa yol aça və Çinin güclənməsinə səbəb ola bilər:

“Sanksiyalardakı tərəddüdlər bununla bağlıdır. Rusiya da artıq Ukrayna ilə sülh görüşmələrinə başlayıb. Ən son Türkiyədə belə bir görüş təşkil edildi. Rusiyanın Kiyev iqtisamətindən qoşunlarını Donbasa çəkməsi barədə məlumatlar var. Ola bilsin ki, səhnə arxasında da hər hansı razılaşmalar mövcuddur. Bu danışıqlara uyğun olaraq Qərb sanksiyaları zəiflədə və yaxud yeni sanksiyalardan imtina edə bilər”.