KVN Premyer Liqasının aparıcısı Aleksandr Maslyakov "Moskva-Bakı" portalına verdiyi müsahibə zamanı Heydər Əliyev ilə baş tutan unudulmaz görüşü haqqında danışıb.

Axar.az xəbər verir ki, Maslyakov müsahibəsi 1995-ci ildə Odessa və "Bakılı Oğlanlar" komandaları arasında keçirilən oyundan sonra Heydər Əliyevlə görüşdüyünü xatırladıb:

"Bu, nə Azərbaycan üçün, nə Rusiya üçün, nə də Heydər Əlirza oğlu Əliyev üçün asan dönəm idi. Valideynlərimlə birgə prezidentin qəbuluna gəldim. Təkrar edirəm ki, o dönəm olduqca mürəkkəb idi. Bəlkə ona görə bütün nümayəndə heyəti çox gərgin idi. Və Heydər Əliyev gəlir. Cəmi 10 dəqiqəlik ünsiyyət ona kifayət edir ki, ətrafdakı hər kəs onunla həmfikir və müttəfiq olsun. O, əvvəlcə KVN-dən, sonra isə başqa mövzulardan danışdı. O, etimad qazanmağı bacarırdı, ətrafdakıları ələ ala, öz arxasıyca apara bilirdi. Heydər Əliyev məni çox təsirləndirdi. O, "Bakılı Oğlanlar"ı və KVN-i izlədiyini, sevdiyini dedi. Bundan sonra güldü və ətrafdakıları da güldürdü. Bu hərəkəti ilə hər kəsin etimadını qazandı".