20 Yanvar günü TRT-nin nəzdində olan 3 telekanal faciəmizdən danışacaq. Türkiyənin "TRT Haber" və "TRT Avaz" telekanalları yanvarın 20-də Qanlı Yanvar faciəsinin 26-cı ildönümü ilə bağlı 1 saatlıq canlı yayım verəcək.

Bu sözləri Axar.az-a TRT-nin Bakı təmsilçisi Yıldıray Arslan bildirib.

Onun sözlərinə görə, TRT ənənəsinə sadiq qalaraq bu il də faciə qurbanları və onu törədənlərlə bağlı Şəhidlər Xiyabanından canlı süjetlər və xəbərlər yayımlayacaq:

"20 Yanvar günü "TRT Haber" və "TRT Avaz" televiziya kanallarında faciədən bəhs edən 4 videoçarx və Qədir Rüstəmovun ifasında səsləndirilmiş "Sona bülbüllər" mahnısının fonunda qısametrajlı film efirə veriləcək. Eyni gündə 20 Yanvar faciəsinin 26-cı ildönümü ilə bağlı 25 dəqiqəlik xüsusi veriliş də hazırlayırıq. Faciəni yaşayan bir nəfər və Qafqaz Beynəlxalq Münasibətlər və Strateji Araşdırmalar Mərkəzinin rəhbəri Araz Aslanlı bu verilişin qonağı olacaq".

O, 20 Yanvar günü TRT-1-in gün ərzində xəbərlər buraxılışlarında da bu mövzunun gündəmdə saxlanacağını bildirib.