Rusiya Türkiyə ilə münasibətlərin normallaşması üçün daha əlverişli məqam gözləyir.

Bu haqda politoloq Tofiq Abbasov Axar.az-a açıqlamasında danışıb. Ekspertin qənaətinə görə, indiki vəziyyətdə Türkiyə-Rusiya münasibətlərinin düzəlməsini gözləmək əbəsdir:

"Rəsmi Ankara Səudiyyə və Qətərlə strateji əməkdaşlığı davam etdirir. Bu o deməkdir ki, Türkiyə bundan sonra da regionda gedən proseslərdə bəyan etdiyi məqsədlərdən geri çəkilməyəcək. Bu isə Moskvanı heç cür qane etmir. Kreml son hərəkətləri ilə açıq şəkildə bildirir ki, əgər Ankara öz siyasətini dəyişməsə, heç bir yaxınlaşma olmayacaq. İndi də Moskvanın nizamasalma prosesində Suriya kürdlərinin iştirak məsələsini irəli sürməsi Türkiyə ilə münasibətləri uçuruma aparır".

Rusiya-Türkiyə arasında mövcud siyasi durumu dəyərləndirən Tofiq Abbasov hesab edir ki, iki dövlətin baxışlarında böyük kontrastlar yaranıb:

"Hazırda Moskva Əsədin qalmasına çalışır, Türkiyə isə onun getməsini əsas şərt kimi qiymətləndirir. Rusiya qeyd-şərtsiz ələviləri, Türkiyə isə sünni icmalarını dəstəkləyir. Moskva bu ölkənin parçalanmasının tərəfdarı deyil. Nəhayət, Ankara indiki Suriya ərazisində nəzarəti əlinə almaq istəyir, Moskva isə əksinə, status-kvonu olduğu kimi saxlamağın tərəfdarıdır. Bir sözlə, iki nüfuzlu ölkə təzadlı mövqedən çıxış edərək artıq öz aralarında sərt qarşıdurma aparır. Görünür, Kreml münasibətlərin normalaşması üçün daha münasib şəraitin formalaşmasını gözləyir".