"Kommersant"ın müxbiri Kiril Krivoşeyev Dağlıq Qarabağ münaqişəsi ilə bağlı Bakıya səfər edib.

Axar.az xəbər verir ki,"Kommersant" Azərbaycan paytaxtının döyüş xəttindən aralıda yerləşməsinə baxmayaraq, vətənpərvərlik əhval-ruhiyyəsinin artmasının burda da özünü göstərdiyini yazıb:

"Bakıda işğal olunmuş əraziləri azad etmək ideyasını dəstəkləyən vətənpərvərlik plakatları o qədər də çox deyil. Cəbhə bölgəsində döyüşlərin getdiyini yerli kafelərdə göstərilən televiziya reportajlarından, maşın və eyvanları bəzəyən bayraqlardan bilmək olar.

Bu günlər ərzində bir qrup kişi inzibati binaların önünə yığışaraq ön cəbhəyə göndərilmək istəyini bildirdi. Hakim qüvvələr isə özəl heyətin mövcud olduğunu və könüllülərə ehtiyac olmadığını açıqladı.

Buna baxmayaraq, həm tələbələr, həm köhnə bakılılar müharibəyə getməyə hazır olduqlarını, Ali Baş Komandanın əmrini gözlədiklərini deyir.

Ən böyük aksiya Nərimanov Rayon İcra Hakimiyyətinin yanında keçdi.

Bakı sakinləri vətənpərvərlik coşğusundan imtina etmək istəmir.

Bakıda tələbələrin keçirdiyi aksiyalara mən də qoşuldum. Gənclər orduya dəstək məqsədilə şəhərdə nümayişlər keçirir, sonda isə qəhrəmanlarının dəfn edildiyi Şəhidlər Xiyabanına üz tuturdu. Bu gənclər müharibə başlayarsa, günü sabah ön cəbhəyə yollanmağa hazırdır".