Ermənistanda 3-5 adamın hoppanıb-düşməsi ilə heç nə həll edilməz.

Axar.az xəbər verir ki, bu sözləri sabiq baş prokuror və millət vəkili, Ədalət Partiyasının sədri İlyas İsmayılov Teleqraf.com-a müsahibəsində deyib.

Onun sözlərinə görə, ermənilər ictimaiyyətin gözündə xal qazanmağa çalışır:

"Ermənilər Dördgünlük müharibədə yaşadıqları məğlubiyyətdən özlərini itiriblər. İndi çalışırlar ki, ictimaiyyətin gözündə xal qazansınlar. Bu da boş şeydir. Cəbhədə atəşkəs rejimini pozaraq bizim tərəfə atacaqlarsa, biz tərəfdən də cavablarını alacaqlar. Hərbi əməliyyatlar olacaqsa, biz də cavab verib torpağımızı azad etməliyik. Təbii ki, ermənilər sülh yolu ilə bizə torpaq verməyəcək".

Rusiya Xarici İşlər naziri Serey Lavrovun Bakı və İrəvanda apardığı sülh danışıqlarından xeyirli bir şey gözləmədiyini deyən keçmiş deputat Moskvanın İrəvanla daha yaxın olduğunu bildirib:

"Dünən Rusiya kanallarında türklər əleyhinə çıxışlar oldu. Ermənilər hər zaman Rusiyanın yanındadır. Bu baxımdan hesab edirəm ki, Rusiya bizi Ermənistan qədər müdafiə etməz. Təbii ki, Rusiya addım atanda öz dövlət maraqlarını düşünür. İndiki halda Rusiya Ermənistan vasitəsilə regionu nüfuz dairəsində saxlamaq istəyir. Bu zaman Qarabağ münaqişəsində tərəf olan Azərbaycana silah da satırlar. Lakin bu, həm də Rusiya iqtisadiyyatının inkişafı üçün edilir, nəticədə ölkəyə böyük pullar daxil olur. Ola bilsin ki, Rusiyanın Ermənistanla sıcaq münasibətlərini soyudaraq Azərbaycanla yaxınlaşması istiqamətində işlər aparılır. Ancaq mən bu istiqamətdə ciddi nəticə əldə edəcəyimizə inanmıram. Bilirsinizmi, bir daha deyirəm ki, bu münaqişədə iki tərəf var. Onlar heç vaxt erməniləri buraxıb bizi müdafiə etməzlər. Baxın, dünən saxta soyqırımla bağlı od püskürürdülər, iddia edirdilər ki, "soyqrım" olub. Ancaq Rusiyanın baş keşişi Kiril kişi kimi dedi ki, Osmanlı İmperiyasında erməni soyqrımı olmayıb. Heç olmasa Kirilə qulaq assınlar..."

Qarabağ münaqişəsinin danışıqlar vasitəsilə həll edilməyəcəyini deyən partiya sədri Minsk Qrupundan imtina etməyi təklif edib:

"Özümüz aktiv və fəal olmalıyıq. Heç kimdən kömək gözləməyə ehtiyac yoxdur. Düz 20 ildir ki, kömək gözləyirik, deyirik ki, bu ölkələrin dəstəyi ilə münaqişəni həll edəcəyik. Görürsünüz ki, bu müddətdə kömək edən olmadı. Burada hərənin öz marağı var. Odur ki, biz özümüz işləməli, fəal olmalıyıq.

ATƏT-in Minsk Qrupunun qərar və təklifləri məcburi deyil. Əksinə, bu, dövlətlər üçün tövsiyyə xarakterlidir. Ermənilər də tövsiyyə qəbul etmirlər. Ona görə də Minsk Qrupundan imtina etmək lazımdır. Ermənistanda Rusiya əleyhinə keçirilən mitinq və etirazlar da boş şeydir, ciddi proses deyil. Rusiyada 3 milyon erməni yaşayır. Ermənistanda 3-5 adamın hoppanıb-düşməsi ilə heç nə həll edilməz".