Çexiya Xarici İşlər Nazirliyi və "Czech Trade" təşkilatının dəstəyi ilə bu ölkənin "E15 Český export" elektron kütləvi informasiya vasitəsinə məxsus "Český export" jurnalının may buraxılışı Azərbaycana həsr edilib.

Axar.az xəbər verir ki, buraxılışda Azərbaycanın inkişaf edən iqtisadiyyatı, ölkədəki əlverişli biznes mühiti, həyata keçirilən layihələr haqqında məlumat verilir. Habelə xüsusi memarlıq layihələri, modern üslubda inşa edilən binalara diqqət çəkilir, bunun Azərbaycanın inkişafının bariz nümunəsi olduğu vurğulanır.

Xüsusi buraxılışda, eyni zamanda, Azərbaycanın ev sahibliyi etdiyi böyük idman yarışları və digər tədbirlər haqqında ətraflı məlumat verilir, bu tədbirlərin yüksək səviyyədə keçirildiyi qeyd olunur. Xüsusilə ilk dəfə olaraq Azərbaycanda keçirilmiş Avropa Oyunlarının müvəffəqiyyəti haqqında məlumat verilir və yaxın gələcəkdə keçirilməsi nəzərdə tutulan "Formula-1" yarışlarının da uğurla keçirilməsi üçün görülmüş işlərdən bəhs olunur.

Çexiya Xarici İşlər Nazirliyi və "Czech Trade" təşkilatının dəstəyi ilə dərc edilmiş jurnal bu ölkənin dövlət qurumlarına, ali təhsil müəssisələrinə və digər yerli təşkilatlara paylanılıb.