Ötən il Ermənistan-Azərbaycan sərhədinin delimitasiyası sahəsində mühüm nailiyyətlər əldə edilib.

Axar.az xəbər verir ki, bu barədə Ermənistanın xarici işlər naziri Ararat Mirzoyan 2024-cü ilin yekunlarına dair keçirdiyi mətbuat konfransında deyib.

“Əslində, dövlət sərhədinin delimitasiyası komissiyasının birgə fəaliyyətini tənzimləyən ilk beynəlxalq hüquqi sənəd qəbul edilib”, - deyə o qeyd edib.

Mirzoyan bildirib ki, Azərbaycanla bu işin davam etdirilməsi barədə razılıq var və yanvar ayında sərhədin delimitasiyası komissiyalarının növbəti görüşünün keçiriləcəyi gözlənilir.

Ararat Mirzoyan sülh sazişi ilə bağlı xarici işlər nazirləri və ölkə rəhbərləri səviyyəsində bir sıra təkliflərin və ya təkliflərin hissələrinin müzakirə edildiyini, lakin hələlik sülh sazişinin yekun mətninin hazırlanmadığını vurğulayıb.

“Sonuncu təklif təxminən bir yarım ay əvvəl göndərilib. Ermənistan tərəfi cavab gözləyir. 17 bənddən 15-i razılaşdırılıb. Gözləyək və Azərbaycanın cavabının necə olacağını görək. Biz əminik ki, qarşılıqlı qəbul edilə bilən təkliflərlə çıxış etmişik və bunlar yalnız problemlərin həllinə deyil, həm də blokadanın tamamilə aradan qaldırılmasına imkan verəcək”, - deyə Mirzoyan əlavə edib.

Nazir qeyd edib ki, Ermənistan tərəfi “Sülh qovşağı” adlı bir layihə təklif edib və bu layihə xarici tərəfdaşlar tərəfindən müsbət qarşılanıb:

“Ermənistanla Azərbaycan arasında kommunikasiyaların blokdan çıxarılması ilə bağlı Baş nazir Nikol Paşinyan Kazanda bizim təkliflərimizi səsləndirdi, sonra isə onları Mger Qriqoryan təqdim etdi. Mənim qənaətimə görə, ilkin reaksiya kifayət qədər müsbət oldu, lakin hələ rəsmi cavab yoxdur. Biz Arazdəyən-Naxçıvan-Mehri dəmir yolu ilə yüklərin təhlükəsizliyini təmin edəcək gömrük prosedurlarında müəyyən sadələşdirmələr təklif etdik".

Mirzoyan əlavə edib ki, Türkiyə ilə də müəyyən razılaşmalar əldə olunub.

Onun sözlərinə görə, Qars-Gümrü dəmir yolu yalnız iki ölkə üçün deyil, həm də region üçün iqtisadi imkanlar yaradacaq və Azərbaycanla bağlı halda sülhün mühüm amilinə çevriləcək.

Nazir əlavə edib ki, Ermənistan və Azərbaycan sərhədində AB missiyası qalmaqdadır və bu, xüsusilə hazırkı ritorika şəraitində mühüm amildir.

Qeyd edək ki, Azərbaycan öz sərhədlərinə yaxın ərazidə AB-nin “mülki missiya” adı ilə NATO-nun hərbi strukturunun yerləşdirilməsinə etirazını bildirib. Belə ki, bu “missiya”ya AB ölkələri deyil, Kanada da daxil olmaqla, NATO ölkələrinin istefada olan həbçi və kəşfiyyatçıları cəlb edilib. Üstəlik, 2 ay müddətinə yerləşdirilən missiya sonradan Azərbaycanın razılığı olmadan 2 illik uzadılıb. “Missiya”nın müddəti 2025-ci ilin fevralında başa çatır. AB “missiya”nı davam etdirmək üçün Ermənistana təzyiqlərini artırıb.