Baykal gölü hazırda ekoloji fəlakət təhlükəsi ilə üz-üzədir və əgər tədbir görülməsə, o da Aral dənizi kimi yox olacaq.

Axar.az xəbər verir ki, bu barədə informasiyanı "İzvestiya" qəzeti yayıb. Qəzet bununla bağlı Energetika Nazirliyində gizli toplantı keçirildiyini bildirib. Toplantıda Moskva Baykala əsas təhlükəni Monqolustanın Selenqa çayı üzərində üç böyük hidrostansiya tikməsi ilə əlaqələndirib.

Ulan-Batorun belə addım atmasına əsas səbəb Rusiyanın məhz onlara elektrik enerjisini baha qiymətə satmasıdır. Bu isə Monqolustanın iqtisadi vəziyyətini pisləşdirir. Monqolların irəli sürdüyü layihəsinin əsas sponsoru Çindir. Pekin bu layihəyə 827 milyon dollar ayırmaq niyyətindədir.

Qeyd edək ki, Baykal gölü dünyanın ən böyük şirin su hövzəsi hesab edilir.