Rusiya Müdafiə naziri Sergey Şoyqu Türkmənistana səfər edəcək.

Axar.az xəbər verir ki, Şoyqu səfəri zamanı Türkmənistanın hərbi-siyasi rəhbərliyi ilə görüş keçirəcək.

Qeyd edək ki, Şoyqu bundan öncə Qazaxıstana səfər edib. O, səfəri zamanı Şanxay Əməkdaşlıq Təşkilatının müdafiə nazirlərinin görüşünə qatılıb.

Son günlər Rusiya-Türkmənistan münasibətlərində soyuqluq müşahidə olunur. Aşqabad artıq "Qazprom"a qaz satışından imtina edib. Üstəlik, Türkmənistan Moskvanın və Orta Asiya ölkələrinin aktiv iştirakçı olduğu alyansların heç birində iştirak etmir.

Qərbin TAP layihəsini reallaşdırmaq üçün aktiv fəaliyyəti artıq Moskvanı narahat edib. ABŞ Azərbaycanla yanaşı, bu layihəyə Türkmənistanı da qoşmaq istəyir. Rəsmi Bakı da Aşqabadın prosesdə iştirak etməsində maraqlı görünür. Moskva isə Türkmənistandan Azərbaycana çəkiləcək Transxəzər kəmərinə qarşı kəskin mövqe nümayiş etdirir. Rəsmi Kreml bunu Xəzərdə ətraf-mühitin qorunmasına təhlükə yaradacağı ilə əlaqələndirir.