Yekaterinburqda azərbaycanlıların saxlanması ilə bağlı Bakıda mənfi reaksiyaya səbəb olan vəziyyət hazırda hüquq-mühafizə orqanlarının əməkdaşlarının nəzarətindədir.

Axar.az xəbər verir ki, bunu “RİA Novosti”yə müsahibəsində Rusiya Xarici İşlər Nazirliyinin rəsmi nümayəndəsi Mariya Zaxarova deyib.

“Rusiyanın müvəqqəti işlər vəkili Pyotr Volokovıx Azərbaycan tərəfinə lazımi izahat verib və vəziyyətin hüquq-mühafizə orqanlarının nəzarətində olduğuna əmin ola bilərsiniz”, - Zaxarova bildirib.

Qeyd edək ki, iyunun 27-də səhər saatlarında Yekaterinburqda azərbaycanlıların yaşadığı 10-dan çox mənzildə əməliyyat keçirilib. Əslən Ağdamdan olan Səfərovlar ailəsinin əksər üzvləri tutulub. Əməliyyat zamanı iki qardaş - Ziyəddin və Hüseyn Səfərovlar öldürülüb. Daha 9 nəfər isə saxlanılıb.

Məlumata görə, 3 nəfər xəstəxanaya yerləşdirilib. Onların vəziyyətinin ağır olduğu bildirilib.

Azərbaycan Xarici İşlər Nazirliyi məsələ ilə bağlı bəyanat yayıb.