Bu gün ölkənin aparıcı informasiya agentliklərindən olan Lent.az-ın yaranmasından 8 il ötür.

Axar.az xəbər verir ki, "Lent.az" internet portalı 2008-ci il iyunun 25-də fəaliyyətə başlayıb. Saytda operativ xəbərlərlə yanaşı, araşdırmalar, reportajlar və müxtəlif mövzulardan bəhs edən maraqlı materiallar yayımlanır. Portal 8 il ərzində oxucularına 250 minə yaxın material təqdim edib.

"Lent.az" internet portalının Baş direktoru Qabil Abbasoğlu Axar.az-a bildirib ki, sayt yaranarkən belə böyük uğur qazanacaqlarını təxmin etməyiblər:

"Lent.az" 8 il bundan əvvəl fəaliyyətə başlayanda Azərbaycanda internet mediası yenicə təşəkkül tapırdı. Ölkədə anadilli internet resursu az idi. Biz Vüsalə xanımla (Vüsalə Mahirqızı, APA holdinqin baş direktoru – red.) bu məsələni müzakirə edəndə mediada olan bəzi yaxın dostlarımız deyirdilər ki, anadilli sayt oxunaqlı olmayacaq, yəni anadilli oxucular yalnız çap mediasına üstünlük verirlər. Amma bütün bunlara baxmayaraq, düşündük ki, oxucunun marağına uyğun, peşəkar şəkildə fəaliyyət göstərəndən sonra istənilən oxucuda internet mediasına maraq yaranar. Bizim bu təxminlərimiz doğru çıxdı. Sözün düzü, "Lent.az" fəaliyyətə başlayanda elə də böyük hədəflərimiz yox idi. Ancaq indi "Lent.az"ın sadiq və sabit oxucu kütləsi var. Özü də bu, çox ciddi rəqəmdir. Oxucu ilə "Lent.az"ın arasında bir əlaqə var. Biz bunu da qazanc hesab edirik. Çalışırıq ki, oxucularımızın maraqlarına uyğun xidmət edək. Bizi izləyən bütün oxucularımıza təşəkkürümü bildirirəm.

Bir neçə il əvvəl "Lent.az"ın portala çevrilməsi və tərkibində başqa saytların fəaliyyət göstərməsi ilə bağlı planlarımız var idi. Şükür ki, o planların bir hissəsi həyata keçib və keçməkdə davam edir. Biz planlardan və hədəflərdən yayınmamışıq. Ən vacib məsələ ardıcıllığı qorumaq, səbirlə yola davam etməkdir".

Axar.az olaraq "Lent.az" ailəsini 8 yaş münasibəti ilə təbrik edirik.