Sosial şəbəkədə tanış olduğu tələbə Fatma Gülsüm tərəfindən evində bıçaqla qətlə yetirilən türkiyəli aktyor Mehmet Sərdar Sulukayhanın ölümü ilə bağlı yeni detallar ortaya çıxıb.

Kult.az Türkiyə mediasına istinadən xəbər verir ki, hadisə şahidinin ifadəsi diqqət çəkib.

Şahid bildirib ki, “Yaşılçam”ın 62 yaşlı aktyoru hadisədən sonra yaşadığı binanın qarşısında yerə yıxılıb:

“Gecə səs-küyə oyandım. Bir nəfər bıçaqlanmışdı. Həmin şəxs 5 saylı binanın qarşısında yerə yıxıldı. Bu zaman bina sakinləri vəziyyəti görüb dərhal təcili yardım və polis çağırdılar. Hadisəni törətdiyi iddia edilən gənc xanım bir müddət binanın qarşısında gözləyib, daha sonra kilsəyə tərəf qaçıb. Bıçağı da hadisə yerində buraxmışdı”.

Qeyd edək ki, sözügedən hadisə mayın 21-də baş verib.

Şübhəli qismində saxlanılan tələbə aktyorun ona cinsi təcavüz etməyə çalışdığını iddia edib.

Əlavə edək ki, daha əvvəl yayılan məlumatda hadisənin aktyorun evində baş verdiyi bildirilirdi. Belə ki, aktyor tələbə qızı evinə dəvət edib və bilinməyən səbəblərdən tərəflər arasında gərginlik yaranıb. 20 yaşlı Fatma da mətbəğdən bıçaq götürərək aktyora bir neçə dəfə zərbə endirib. Daha sonra isə evdən qaçaraq uzaqlaşıb.