Səudiyyə Ərəbistanı öz ambisiyalarının miqyası ilə dünyanı bir daha heyrətləndirir.

Axar.az Publika.az-a istinadən xəbər verir ki, ölkə dünyanın ilk “səma stadionunu” – yerdən yüksəkdə yerləşən arenanı tikməyi planlaşdırır.

“NEOM Stadium” adlı layihənin videosu sosial mediada böyük səs-küyə səbəb olub.

İlkin məlumatlara görə, stadion təxminən 46 min tamaşaçı tutumuna malik olacaq və 350 metr hündürlükdə inşa ediləcək.

İnnovativ arena Səudiyyə Ərəbistanının DÇ-2034 üçün həyata keçirdiyi möhtəşəm NEOM meqalayihəsinin bir hissəsi olacaq. Əvvəllər təklif olunan layihələr arasında 15 ultra müasir stadion, o cümlədən 92.000 nəfərlik nəhəng “Kral Salman” stadionu var idi.

Əvvəlki plan tikintinin 2027-ci ildə başlanmasını və 2032-ci ilə qədər tamamlanmasını nəzərdə tuturdu. Bununla belə, yeni təsvir konseptin dəyişmiş ola biləcəyinə işarə edir.

Bu, hələ sadəcə bir konsepsiya olsa da, sosial media artıq Səudiyyə Ərəbistanının elmi fantastikanı necə reallığa çevirməyi planlaşdırdığına dair müzakirələr və heyranlıqla partlayır.