"Qarabağ" 10 gün sonra növbəti tarixi matçına çıxacaq.

Axar.az xəbər verir ki, oktyabrın 2-də Milan şəhərindəki "Cuzeppe Maetsa" stadionunda keçiriləcək "İnter" - "Qarabağ" görüşündə hər iki komandaya xal su və hava kimi lazımdır.

"İnter" Avroliqanın qrup mərhələsində ilk Azərbaycan komandası ilə qarşılaşmayacaq. Flaqman "Neftçi" ilə görüşlərdə italyanlar Bakıda 1:3 hesabı ilə qalib gəlsələr də, Milanda komandamız 2:2 hesablı heç-heçəyə nail olaraq tarix yazmışdı.

Bu dəfə "Qarabağ" "Neftçi"nin nəticəsini təkrarlaya biləcəkmi sualı hər kəsi maraqlandırır.

Onu deyək ki, Ağdam təmsilçisi Zaqatala "Simurqu"nu məğub edərək vacib olan üç xalı qazanıb, üstəlik yüksək əhval-ruhiyyəsini, çempionatdakı yerini yüksəldib.

İtalyan klubunun düşərgəsində isə vəziyyət ürəkaçan deyil. "İnter"in baş məşqçisi Valter Matsarri deyib ki, komandası "Palermo"ya qarşı oyunda bacardığı hər şeyi etdi: "Sadəcə, adi bir səhvdən qol buraxdıq. İndi qarşıdakı çempionat və Avroliqa matçına hazırlaşmalıyıq.

Biz çox sıx qrafikdə oynayırıq. Ardıcıl olaraq "Atalanta", "Kalyari" və "Qarabağ"la üz-üzə gələcəyik. Bu qarşılaşmaların hər biri bizim üçün çətin və vacibdir.

Qələbə üçün bütün gücümüzdən istifadə edəcəyik. Qarşıdakı hər 3 oyunumuz ölüm-dirim mübarizəsi olacaq. Avroliqada da uğur qazanmaq istəyirik. Çempionatda vəziyyətimiz heç də ürəkaçan deyil".

***

Bu arada isə "Qarabağ"da daha bir futbolçu zədələnib. 5 aylığa sıradan çıxan braziliyalı Çumbinyonun ardından onun həmyerlisi Danilo Dias da komandasına kömək edə bilməyəcək.

Yayda Portuqaliyanın "Maritimu" klubundan gələn Danilo Dias dizində ağrılar hiss edirdi. "Qarabağ"ın tibbi heyəti davamlı müalicələrlə əməliyyatın qarşısını almağa cəhd edirdi. Ancaq 29 yaşlı futbolçunun dizində "mensk" əməliyyatı qaçılmaz olub. Danilo yaxın günlərdə Türkiyədə cərrah masasına uzanacaq. O, təxminən 1 ay yaşıl meydanlardan uzaq qalacaq.

Axar.az oxuculara "İnter"- "Neftçi" arasındakı görüşdən qolları təqdim edir: