"Bakı" klubunun sabiq üzvü Ruslan Leviqa ağır avtomobil qəzası törədib.

Axar.az xəbər verir ki, Ukrayna idman mətbuatının baş xəbərinə çevrilən bu hadisədə Leviqanın həmkarının öldüyü bildirilir. Vaxtilə "Bakı"nın rəhbəri Hafiz Məmmədova məhkəmədə qalib gələn, 51 min dollarını geri alan Leviqanın törətdiyi ağır qəzada həmkarı dünyasını dəyişib.

Poltava şəhəri yaxınlığında qəzaya uğraması nəticəsində Ukrayna yığmasının sabiq futbolçusu - Sergey Zakarlyuk ölüb. Hazırda "Naftovik"in üzvü olan Leviqa isə xəstəxanadadır.

Qeyd edək ki, Sergey Zakarlyuk 2002-2004-cü illərdə Ukrayna millisində 9 oyunda forma geyinib. Ölkəsinin məşhur klublarında - Kiev "Arsenal"ı, "Dnepr", "Şaxtyor", "İliçeveç", "Metallurq", "Vorskla" və "Poltava"da oynayıb. Ötən ay Ukrayna millisinin başqa bir keçmiş oyunçusu, Kiyev "Dinamo"sunun əfsanəsi Andrey Qusin də avtoqəza zamanı həlak olub.