"Bu günə kimi bir çox oyunu baxmışam. Azərbaycanda çox prespektivli futbolçular var. İnanıram ki, onlar üzərlərində daha da işlədikdən sonra milli komandaya xeyir verəcəklər".

Bu sözləri Azərbaycan milli komandasının baş məşqçisi Prosineçki "Qol.az"a geniş müsahibəsində deyib. Baş məşqçi qeyd edib ki, xaricdə oynayan oyunçularımız barədə də məlumatı var, amma əsas vaxtını yerli çempionatda oynayan futbolçulara sərf edir.

Xorvat mütəxəssisin sözlərinə görə, milli komandada elə də böyük dəyişiklik etməyəcək:

"Mən milli komandanı tamamilə gəncləşdirəcəyimə söz verməmişəm. Bu məlumat səhvdir. Yaşından aslı olmayaraq, yığma komandaya kömək edə biləcək hər bir futbolçu millidə oynamaq şansı əldə edəcək.

Dəvət edəcəyim oyunçunun yaşından çəkinmirəm. 17-18 yaşında hansısa bir futbolçunun bacarığını görsəm, onu millidə oynatmaqdan qorxmaram. Əsas budur ki, həmin futbolçu yaxşı formada olsun".