Bu gün Azərbaycan Premyer Liqasında 20-ci turun oyunlarına start verilib.

Axar.az-ın məlumatına görə, turun açılış matçı Qəbələdə baş tutub. Matçın 74-cü dəqiqəsindən azlıqda qalan AZAL görüşü qələbə ilə başa vurmağı bacarıb. Oyunun əsas vaxtına əlavə edilmiş 3-cü dəqiqədə Rəşad Abdullayev penaltidən komandasına 3 xal qazandırıb.

AZAL ötən tur da "Neftçi"yə son dəqiqə qolu ilə qalib gəlmişdi.

Günün son qarşılaşmasında "Neftçi" və "Simurq" üz-üzə gəlib. Son turda səfərdə AZAL-a uduzan Arif Əsədovun komandası bu görüşdə qələbə qazanmaqla çempionluq uğrunda mübarizəsini davam etdirməyə çalışacaqdı. Lakin turnir cədvəlində "Neftçi"nin ən yaxın izləyicisi olan "Simurq" səfərdən bir xalla ayrılmağa nail olub. Bu görüşdə qapılara qol vurulmayıb - 0:0.

Premyer Liqada 20-ci tura sabah keçiriləcək iki oyunla yekun vurulacaq. Lider "Qarabağ" - əgər oyun baş tutarsa - "Bakı" ilə qarşılaşacaq. Hafiz Məmmədovun komandasında yaşanan maliyyə böhranına görə oyun təxirə salına bilər. "İnter" isə "Xəzər-Lənkəran"ı qəbul edəcək.