19:47

Dekabrın 26-da Gənclər və İdman Nazirliyinin "İlin idman yekunları" adlı qala mərasimi keçirilir.

Axar.az xəbər verir ki, mərasimdə müxtəlif nominasiyalar üzrə qaliblər açıqlanır.

İlin ən yaxşı qadın idmançısı qılıncoynatma üzrə millimizin üzvü Anna Başta seçilib. Şahmatçı Gövhər Beydullayeva ikinci, bədii gimnast Zöhrə Ağamirova üçüncü olub.

“İlin ən yaxşı kişi idmançısı” nominasiyasında yunan-Roma güləşçisi Eldəniz Əzizli bütün rəqiblərini qabaqlayıb. Şahmatçı Abdulla Qədimbəyli ikinci, cüdoçu Hidayət Heydərov üçüncü yeri tutub.

“İlin ən yaxşı qadın komandası” adına bədii gimnastika üzrə qrup hərəkətləri komandası layiq görülüb. Voleybolçulardan ibarət yığma ikinci, qılıncoynatma üzrə milli komanda üçüncü yerlə kifayətlənib.

Ən yaxşı kişi komandaları arasında "Qarabağ" futbol klubu qalib olub. Minifutbol üzrə yığma ikinci, 3x3 basketbol millisi üçüncü yeri tutub.

“İlin ən yaxşı baş məşqçisi” "Qarabağ"a rəhbərlik edən Qurban Qurbanov seçilib. Onu yunan-Roma güləşi üzrə milli komandanın baş məşqçisi Aleksandr Tarakanov və bədii gimnastika üzrə yığmanın çalışdırıcısı Siana Vasileva izləyib.

Futbol üzrə FIFA referisi Əliyar Ağayev “İlin ən yaxşı hakimi” adına layiq görülüb. Cüdo hakimi Nazim Umbayev ikinci, boks hakimi Anar Babanlı isə üçüncü olub.

***

Mərasimdə daha 4 nominasiya üzrə qaliblər müəyyənləşib.

Bakı Su İdman Sarayı “İlin idman qurğusu” adına layiq görülüb. Milli Gimnastika Arenası ikinci, “Kür” Olimpiya Tədris-İdman Mərkəzi üçüncü olub.

1 saylı uşaq-gənclər şahmat məktəbi “İlin uşaq-gənclər idman məktəbi” seçilib. Onu “Vətən” RİOEUG Futbol Məktəbi və Şabran UGİM izləyib.

“İlin fair-play mükafatı” "Qarabağ"ın baş məşqçisi Qurban Qurbanova təqdim edilib. Bu nominasiya üzrə ikinci yeri Azərbaycan Badminton Federasiyası, üçüncü yeri isə qadın güləşçi Elnurə Məmmədova tutub.

“Prezident kuboku” reqatası (Suqovuşan-Mingəçevir) ilin idman tədbiri nominasiyası üzrə qalib olub. İlk "üçlüy"ü Şəkidə “İdman Festivalı 2022” və yunan-Roma güləşi üzrə dünya kuboku yarışı tamamlayıb.