Azərbaycan Premyer Liqasında XXVI turun daha bir matçı baş tutub.

Axar.az xəbər verir ki, “Qarabağ” autsayder “Səbail”i qəbul edib.

Meydan sahibləri 24-cü dəqiqədə Elvin Cəfərquliyevin qolu ilə hesabı açıb. Bundan 10 dəqiqə sonra Musa Qurbanlı fərqlənərək, qollarının sayını 18-ə çatdırıb və bombardirlər yarışında birinci pilləyə yüksəlib.

Julio Romao 53-cü dəqiqədə cərimə meydanı həndəvərindən mükəmməl zərbə ilə toru silkələyib. Bu, həm də qarşılaşmada vurulan sonuncu qol olub və “Qarabağ” meydanı 3:0 hesablı qələbə ilə tərk edib.

Qeyd edək ki, turun “Kəpəz” – “Zirə” və “Turan Tovuz” – “Qəbələ” görüşləri 1:1 hesablı heç-heçə ilə nəticələnib, “Sabah” “Sumqayıt”ı 4 cavabsız qolla üstələyib. Tur martın 12-də keçiriləcək “Şamaxı” – “Neftçi” matçı ilə yekunlaşacaq.