Azərbaycan rekordçusu, 14 qat çempion Rövşən Xəlilovla şəxsi tanışlığım olmasa da, haqqında çox eşitmişdim. Müsahibə almaq istədiyimi deyəndə, böyük məmnuniyyətlə razılıq verdi.

Ən gənc Avropa çempionu

- Sizi çempion kimi çoxları tanıyır, lakin nailiyyətləriniz haqqında ola bilsin ki, bir o qədər məlumatlı olmasınlar.

- Yeniyetmə və gənclər arasında sambo və sərbəst güləş üzrə Azərbaycan çempionatının mükafatçısı olmuşam.

- Poverliftinq növünün dərəcələri mövcuddurmu və hansılardır?

- Poverliftinq güc idmanıdır. Bundan başqa, mən gilqaldırma, mass-vrestlinq, benc-press kateqoriyaları üzrə də nailiyyətlər əldə etmişəm. 4 dəfə Azərbaycan rekordçusu olmuşam, 2013-cü ildən poverliftinq idman növü üzrə gənclər arasında Avropa çempionu adını qazanmışam.

- Sadaladığınız idman növləri üzrə titullara sahib olduğunuz halda nədənsə sizin məhz yeraltı nəqliyyatdan istifadə etdiyinizin şahidi oldum. Bu, sadəlikdən irəli gəlir, yoxsa?..

-Bilirəm ki, siz bir çox idmançıların bahalı maşında və dəbdəbəli geyim-keçimdə görməyə alışmısınız. Amma nəzərinizə çatdırım ki, poverliftinq qeyri-olimpiya idman növü olduğu üçün dövlət tərəfindən hər hansı bir maddi dəstəklə təmin olunmur. Bu isə o anlama gəlir ki, yarışlara öz şəxsi hesabımızla qatılırıq. Çox vaxt bu, məndə alınmır. Məsələn, götürək elə noyabr ayının 15-də Portuqaliyada keçirilən VPC üzrə dünya çempionatını. Maddi çətinliyim ucbatından bu yarışa qatıla bilmədim. Lakin dekabrın 20-21-i İstanbulda "Boğaziçi" kubokunda yarışlara məşqçimin və dostlarımın maddi dəstəyi sayəsində qatıldım. Sözügedən yarışlarda 10 ölkədən iştirak edən 50 idmançı arasında 210- 180 kq nəticə ilə poverliftinqin benc- press və dedlift növləri üzrə birincilik əldə etdim və nəticələrə görə mütləq çempion tituluna layiq görüldüm.

- İdmançılar bədən quruluşları və bacarıqları ilə seçildiklərinə görə reklam və film sahəsində onlara hər zaman tələbat var.

- Doğrudur. Mən döyüş filmlərində aktyor qismində yer ala bilərdim, bu məsələ ilə bağlı rejissorlardan təklif gözləyirəm.

Bütün deyilənlərə baxmayaraq...

- Bəlkə, özünüz kastinqlərə müraciət edəsiniz? Ən azından tələb olunan kadr qismində sizin bacarıqlarınız tələb oluna bilər.

- Mən "Azərsell"in reklam çəkilişləri üzrə elan edilmiş kastinqə qoşuldum, lakin çox qəribə iddia ilə qarşılaşdım.

- Hansı iddia ilə?

- Baxış keçirildi və mənə bildirdilər ki, olduqca yaraşıqlı və cüssəli olmağıma rəğmən, gülərüz deyiləm. Ciddi olmağımla onların çəkilişindən kənarda qalmalı olacağam. Beləliklə, bəxtim burada da gətirmədi.

- Güləş və sambo üzrə daha çox maddi və mənəvi irəliləyiş əldə edə biləcəyiniz təqdirdə nə üçün maddiyyatdan və şöhrətdən bir qədər uzaq olan poverliftinq idman növünə üstünlük verdiniz?

- Uşaqlıqdan sambo və sərbəst güləşə hədsiz marağım olub. Hətta dost-tanış məni uşaqlıqda güləş üzrə Olimpiya çempionu Namiq Abdullayevin şərəfinə "Balaca Namiq" deyə çağırırdı. Doğrudur, mən məşğul olduğum idman növləri üzrə daha çox nailiyyətlər əldə edə bilərdim. Bu sahədə mənə örnək olan müəllimlərim Mehman və Əlağa müəllim də dəfələrlə bu fikri haqqımda söyləyiblər. Amma bütün deyilənlərə baxmayaraq, mən poverliftinqi seçdim və bu yolda mənə dəstək olan dəfələrlə dünya və Avropa çempionu, dünya rekordçusu, mənim şəxsi məşqçim Samir Məmmədov oldu. O məni özü kimi çempion etməyi bacardı. Poverliftinqin idman növü üzrə yığma komandanın baş məşqçisi Şəmsi Bayramov da mənə bu yolda olduqca böyük dəstək göstərir.

Özümü bu idman növündə tapdım. Sadəcə olaraq, bizim ölkədə sözügedən idman növü zəif inkişaf edib.

İdmançı qız ilə ailə qurmaram...

- İdmançı həmkarınız Şahin Atamovdan müsahibə alarkən ona "idmançı qızla ailəqurardınızmı", - sualı ilə müraciət etdim, o isə qətiyyətlə "xeyr" dedi. Siz necə, idmançı qızla ailə qurardınızmı?

- Həyatımızda hər zaman hər şey baş verə bilər. Sadəcə olaraq, mən olduqca qısqancam. Bəllidir ki, idman karyerası insanı şəxsi həyatdan xeyli uzaqlaşdırır. İdmançı qızlar da günlərinin əsas hissəsini idmana ayırır, günlərlə, həftələrlə yarışmalarda iştirak etmək üçün xarici səfərlərdə olurlar. Bütün bunları nəzərə alaraq, öz ciddi xasiyyətimlə ölçüb-biçirəm və qətiyyətlə "yox" deyirəm. Lakin unutmayaq ki, biz insanların taleyi yalnız Allahın əlindədir.

- Xanımların idmançı oğlanlara olan marağı heç kəs üçün sirr deyil. Məşq etdiyiniz tələbələriniz arasında xanımlardan sevgi təklifi almısınızmı?

- Tələbələrimin sevgi etirafları ilə qarşılaşmamışam, amma xanımların diqqətini hər zaman üzərimdə hiss edirəm. Düşünürəm ki, heç bir xanıma görə idmanı atmağa dəyməz. İdmançı öz nəfsinə hakim olaraq, qadınlardan uzaq gəzərsə, bu onun karyerasına xələl gətirməz.

- İdmançı yoldaşlarınız bir neçə xarici dildə sərbəst danışır...

- Mən Bakı İslam Universitetinin Şərqşünaslıq fakültəsini bitirmişəm, ərəb və fars dilləri üzrə təhsil almışam. Rus və türk dillərində də danışa bilirəm.

- Xarici ölkələrdən dəvət alsanız, orada yaşamağa və çalışmağa razı olardınız?

- Ermənistandan savayı istənilən ölkənin dəvətini qəbul edərdim.

Bayrağımız zirvələrdə dalğalansın...

- Amma siz bu zaman Azərbaycan bayrağı altında çıxış edə bilməyəcəksiniz.

- Azərbaycan bayrağı altında yarışa qatılmasam da, ən azından meydana Azərbaycan musiqisi altında daxil olaram. Mən poverliftinq üzrə çempion Zahir Xudayarovu və kikbksinq idman nözü üzrə çempion Zabit Səmədovun adlarını misal çəkə bilərəm. Onlar artıq bir neçə ildir ki, xaricdə yaşayır. İndiki uğurları əvvəlkindən daha çoxdur.

- İdmançı nailiyyət üçün hansı şərtlərə əməl etməlidir?

- Birinci növbədə idmançı öz qüvvəsini hesablamalıdır. Öz-özlüyündə məşq proqramına tab gətirib-gətirməyəcəyini ölçüb-biçməli və xüsusi pəhrizlərlə bədənini sözügedən ağır rejimə uyğunlaşdırmalıdır.

- Sizcə, xüsusi pəhrizlər gərgin məşq edən cavan orqanizmi taqətdən salmırki?

- Qətiyyən. Əgər idmançı gündə 4-5 dəfə sağlam qidalanaraq, un məmulatlarından hazırlanan xörəklərdən, karbohidrat tərkibli qidalardan imtina edib, təbii meyvə şirələrindən istifadə etsə, bu onun orqanizmi üçün faydalı olar.