Ötən gün Ermənistan millisi Gürcüstan qeydiyyatında olan təyyarə ilə Kosovanın paytaxtı Priştinaya uça bilməyib.

Axar.az xəbər verir ki, bu barədə Ermənistan Futbol Federasiyası məlumat yayıb.

Bildirilib ki, buna səbəb Gürcüstan və Kosova arasında diplomatik münasibətlərin olmaması göstərilib:

"Gürcüstan Kosovanın müstəqilliyini tanımır. Gürcüstan qeydiyyatlı təyyarənin Priştinaya uçuşu üçün Gürcüstan Xarici İşlər Nazirliyindən diplomatik razılıq tələb olunurdu. Daşıyıcı aviaşirkət lazımi razılığı ala bilməyib. Bu halda, Ermənistan tərəfi təyyarəni dəyişərək, Avropa Birliyində qeydiyyatda olan təyyarə ilə Kosovaya uçmalı olub”.

Xatırladaq ki, iyunun 6-da keçirilmiş yoldaşlıq görüşündə Kosova Ermənistanı darmadağın edib - 5:2.